АҞӘА, ԥхынгәы 13 – Sputnik, Бадраҟ Аҩӡба. Хьыбла Гьерзмааԥҳа дызлахәу аспектакль "Медеиа" ахь абилеҭқәа ԥшь-сааҭк рыҩныҵҟа иҭиин, иҳәеит Аурыс драматә театр адиректор Иракли Хынҭәба.
Ашьыжь асааҭ ааба аҟалара маҷк шагыз атеатр акассахь иааиуа иалагеит аҟазара абзиабаҩцәа.
XV аиубилеитә фестиваль "Хьыбла Гьерзмааԥҳа шәаалыԥхьоит…" сынтәа ииубилеитәуп, иҷыдоуп. Имҩаԥысуеит нанҳәа 3-4 рзы. Иара аконцерттә программақәа ҩба рыла ишьақәгылоуп. Имҩаԥгахоит Диоскураа рыԥшаҳәаҟны аҭоурых-культуратә ҳәырԥсарра "Аҟәа абааҟны".
Афестиваль асасцәа дахьқәа ракәны иааԥхьоуп аспектакль "Медеиа" арежиссиор Александр Титель, адирижер Феликс Коробов, ақәыргылаҩ Владимир Арефьев.
Афестиваль ҩ-программак рыла еиҿкаауп. Актәи амш аҽны афестиваль аҭааҩцәа ирылшоит аоператә спектакль "Медеиа" (Луиджи Керубини, ақәыргылаҩ — Александр Титель) абара, аҩбатәи амш азы аџьазтә пианист Даниил Крамери итрио "Опера. Джаз. Блюз" дрыцықәгылоит Хьыбла Гьерзмааԥҳа.
Жәларбжьаратәи афестиваль "Хьыбла Гьерзмааԥҳа шәаалыԥхьоит…" еиҿкаан 2001 шықәса рзы, Аԥсны имҩаԥысуан. 2014 шықәса рзы Москва, К. С. Станиславскии В. И. Немировичи-Данченкои рыхьӡ зху Амузыкатә театр аҟны имҩаԥысит. 2015 шықәса рзы XIV афестиваль Вена, Музикфераин азал аҟны имҩаԥган. 2016 шықәса рзы – Швеицариа, Санкт-Морице.
