АҞӘА, ԥхынгәы 14 – Sputnik, Рада Ажьиԥҳа. Апресс-конференциа рхы аладырхәит Аԥсны акультуреи аҭоурых-культуратә ҭынха аиқәырхареи рминистр Ельвира Арсалиаԥҳа, уи лхаҭыԥуаҩ Баҭал Кобахьиа, Аҳәынҭқарратә аурыс драматә театр адиректор Иракли Хынҭәба, аинформациатә маҵзура Sputnik анапхгаҩы Инал Лазба, ажурналистцәа.
Хьыбла Гьерзмааԥҳа лиубилеитә фестиваль аҟны асцена лырлашоит колхаа раҳкәажә Медеиа лхаҿрала. Афестиваль мҩаԥысраны иҟоуп Диоскураа рыԥшаҳәаҟны, нанҳәамза 3-4 рзы.
"Афестиваль амҩаԥгара аидеиа иит Аԥсны, иахьа иара аҿиарамҩа иануп. Афестиваль 15 шықәса ирҭагӡаны имҩаԥган еиуеиԥшым аспектакльқәеи аконцертқәеи. Сынтәа иазыҳаӡбеит аоператә спектакль "Медеиа" ақәыргылара. Ахәаԥшцәа ахә ҳаракны иршьап ҳәа сгәыӷәуеит", — ҳәа лҳәеит Хьыбла Гьерзмааԥҳа.
Аоператә спектакль "Медеиа" анагӡаразы абжьы ӷәӷәа ухазар ауп, ҳәа азгәеиҭеит Александр Титель.
"Абжьы ӷәӷәа ухазар ауп аоператә спектакль "Медеиа" анагӡаразы. Акыр шықәса раԥхьа иара анагӡаразы Хьыбла илыдазгалахьан, аха дақәшаҳаҭымхеит, иахьа уи аҳәаразы дызҳаит ҩныҵҟалагьы, ҟазарылагьы", — ҳәа ациҵеит иара.
Sputnik анапхгаҩы Инал Лазба иажәақәа рыла, афестиваль амҩаԥысшьа зегьы аарԥшразы аинформациатә маҵзура иамоу аресурсқәа зегьы рхы иадырҳәоит.
"Ас еиԥш иҟоу аформат ҿыц, Москвеи Аҟәеи рҟны иҟоу Sputnik апресс-центрқәа рыбжьара авидеоеимадара амҩаԥгара Хьыбла шәыла иахьааҳартыз акыр ҳазгәдууп. Афестиваль амҩаԥысшьа аарԥшразы, уи ашьҭахь апресс конференциа амҩаԥгра ҳазыхоиуп, иҳамоу алшарақәа зегьы ҳхы иаҳархәоит ", — ҳәа иҳәеит Лазба.
Авидеоеимадара ахырқәшамҭаз Хьыбла Гьерзмааԥҳа ажурналистцәа рызҵаарақәа рҭак ҟалҵеит.
Афестиваль ҩ-программак рыла еиҿкаауп. Актәи амш аҽны афестиваль аҭааҩцәа ирылшоит аоператә спектакль "Медея" (Луиджи Керубини, ақәыргылаҩ — Александр Титель) абара, аҩбатәи амш азы аџьазтә пианист Даниил Крамери итрио "Опера. Джаз. Блюз" дрыцықәгылоит Хьыбла Гьерзмааԥҳа.
Жәларбжьаратәи афестиваль "Хьыбла Гьерзмааԥҳа шәаалыԥхьоит…" еиҿкаан 2001 шықәса рзы, Аԥсны имҩаԥысуан. 2014 шықәса рзы Москва, К. С. Станиславскии В. И. Немирович-Данченкои рыхьӡ зху Амузыкатә театр аҟны имҩаԥысит. 2015 шықәса рзы XIV афестиваль Вена, Музикфераин азал аҟны имҩаԥган. 2016 шықәса рзы – Швеицариа, Санкт-Морице.
