АҞӘА, ԥхынгәы 20 – Sputnik, Роберт Џьапуа. Аԥсны Аԥыза-министр Артур Амқәаб игәрамгара ахцәажәара еиҭахыгоуп атәыла Ахада иҳәарала. Абри атәы иҳәеит Аԥсны Жәлар Реизара аиҳабы Валери Бганба.
"Аԥсны Аԥыза-министр Артур Амқәаб игәрамгара ахцәажәара еиҭахыгоуп атәыла Ахада иҳәарала. Атәыла Ахада иҭахуп хаҭала аилатәара далахәхарц", — иҳәеит Аԥсны Жәлар Реизара аиҳабы Валери Бганба.
Аԥыза-министр игәрамгараз азҵаара шьҭыхын Апарламент реилатәараҟны 2016 шықәса жәабранмза 3 рзы, аԥсуа зеиԥштәылауаҩратә паспортқәа рыԥсахра аҿҳәара аилагара инадҳәаланы.
