АҞӘА, ԥхынгәы 21 — Sputnik. Атәылаҿ амчра бџьаршьҭыхрыла анапаҿы аагараз аҽазышәара ашьҭахь Ҭырқәтәыла Ахада Таиип Ердоган атәылаҿ аҭагылазаашьа ҷыда алеигалеит. Абри азы ақәҵара рыдыркылеит аԥшьашаҽны ҳәа адырра ҟанаҵоит Resmi Gazete.
Ердоган иажәақәа рыла аҭагылазаашьа ҷыда алагалоуп ақәгылара иалахәу ахаҿқәа рганахьала иахәҭаны иҟоу ауснагӡатәқәа хра рыманы адкыларазы.
Иара убасгьы иазгәеиҭеит аҭагылазаашьа ҷыда адемократиеи ауааԥсыра рзинқәеи ишрԥырхагам.
Ԥхынгәы 16, ахәаша ауха ҭырқәтәыла аҭыԥ аман абџьар ахархәарала атәылаҟны амчра ахҳәара. Асабша ашьыжь аруаа дырҭаслымуа иалагеит. Атәыла анапхгара алаҳәара руит амчра рнапаҿы ишыҟоу ала.
Азинмчрақәа иахьазы иааныркылахьеит 6000-ҩык рҟынӡа арратә чынқәа. Аҵыхәтәантәи адыррақәа инарықәыршәаны иҭахеит 290-ҩык ауааԥсыра. Ҭырқәтәыла анапхгара аҭыԥ змаз ахҭыс зхароу ҳәа ихьӡ рҳәеит аоппозиционер Фетхуллах Гиулен, ЕАШ (США) инхо.
