АҞӘА, ԥхынгәы 22 — Sputnik. Урыстәыла Ахада Владимир Путин Аҳәынҭқарратә Думахь ирыдигалеит Аԥсни Урыстәылеи рыбжьара ашьаус аҟны азинтә цхыраара реибаҭаразы Аиқәшаҳаҭраз азакәан апроект аратификациа азуразы.
Аиқәшаҳаҭра анапы аҵаҩын Санкт-Петербург, лаҵарамза 28 2015 шықәса рзы. Аиқәшаҳаҭра инақәыршәаны аганқәа рхахьы иргоит ашьаус аҟны наҟ-ааҟ аицхыраара.
Аиқәшаҳаҭра иҳәаақәнаҵоит аганқәа ирибаҭо азинтә цхыраара ахышәа-ҵышәа, азинтә цхыраара аҟаҵаразы азыҳәа аформа, аҵакы.
"Аиқәшаҳаҭра иамҽханакуеит Урыстәылатәи Афедерациа азакәанԥҵара аԥҟаррақәа инархыганы аҽа ԥҟаррақәак. Иаҳҳәап: аиқәшаҳаҭра ахәҭаҷ 6 апункт 1 апунктҵаҟа 1 аҟны иарбоуп азыҳәа, азыҳәа ззыҟарҵо аган асуверинитети, ашәарҭадареи, ауаажәларратә еиҿкаареи аԥхасҭа рнаҭозар, азинтә цхыраара мҩаԥгахом ҳәа".
