АҞӘА, ԥхынгәы 22 – Sputnik, Бадраҟ Аҩӡба. Аҟәеи Аҟәа араиони рсанитартә ҳақьым хада Алла Белиаева Sputnik иазеиҭалҳәеит акәыбырқәа рнырҵәара ахԥатәи аетап иалагеит ҳәа.
"Ахԥатәи аетап аангьы имҩаԥгахоит уаанӡатәи аетапқәа раан имҩаԥаагоз аусқәа. Аамҭак ала аус рулоит абригадақәа хԥа", — лҳәеит лара.
Аҟәеи Аҟәа араиони рсанитартә ҳақьым хада Алла Белиаева лажәақәа рыла уаанӡатәи ауснагӡатәқәа иаагәоуҭартә еиԥш аҭагылазаашьа еиӷьыртәит.
"Ставропольтәи анаука-ҭҵааратә институт аҟазауаа, ара иааны иҟоу иалыркааит акәыбырқәа ахьырацәоу аҭыԥқәа. Зехьынџьара дара еиҵахо иалагеит Сахаров имҩа 25, Абазинскаиа 6 рыҟны ада. Урҭ аҩнқәа рхатәы проблемақәа рымоуп уи ауп акәбырқәагьы заҳзықәымго", — лҳәеит лара.
Акәыбырқәа рнырҵәаразы аусурақәа мҩаԥыргоит Агәӡера инаркны ԥсоутәи аҳәаа аҟынӡа. Аусурақәа мҩаԥгахоит ԥшьымш рыла.
Аҵыхәтәантәи 25 шықәса рыла арҭ аусурақәа мҩаԥысуеит раԥхьаӡа акәны.
