АҞӘА, ԥхынгәы 22 – Sputnik, Роберт Џьапуа. 35 зхыҵуа ашьапылампыл абзиабаҩцәа рхы аладырхәуеит Аҟәа ашәахьа, ԥхынгәы 25 рзы имҩаԥысраны иҟоу ашьапылампыл хәыҷы аматч. Абри атәы ҳкорреспондент изеиҭеиҳәеит аиндаҭлара аиҿкааҩцәа ируаӡәку Едуард Аршба.
"Асеиԥш атурнир мҩаԥымсижьҭеи акрааҵуеит. Аиҳарак ихәмаруаз 20-25 шықәса зхыҵуаз ракәын. Ари аҩыза ашьапылампыл ауаа ирылаҵәоит", — иҳәеит Аршба.
Иара иажәақәа рыла 35 зхыҵуа ашьапылампыл абзиабаҩцәа атурнир "Кубок Ассоциации предпринимателей Абхазии 2016" ахалархәразы ркомандақәа рырзаҳалқәа рыдкылара иаҿуп.
"Макьаназы акомандақәа быжьба роуп арзаҳалқәа ҳазҭахьоу. Арзаҳалқәа ҳадаҳкылоит ахәаша асааҭ 18:00 рҟынӡа. Акомандақәа заҟа ҟало иахьырԥшхоит атурнир заҟа мшы имҩаԥгахоугьы", — иҳәеит Аршба.
"Кубок Ассоциации предпринимателей Абхазии 2016" хацыркхоит ԥхынгәы 25 2016 рзы, аҟәа.
