АҞӘА, ԥхынгәы 29 — Sputnik, Бадраҟ Аҩӡба. АИХ (СМИ) рымадаразы атәыла Ахада Иусбарҭа аиҳаб ҿыцс дҟаҵоуп Алхас Гагәылиа. Иара иаҳзеиҭеиҳәеит иаԥхьаҟа иусураҟны планқәаны имоу ртәы. Иара иазгәеиҭеит иҿаԥхьа иқәгылоу адҵаусқәа ишидырҵо оперативла аус аура.
"Аусбарҭаҿ русура хацдыркуеит акоманда ҿыц алахәылацәа. Урҭи уаанӡа ара аус зуази рҽеимардоит", ҳәа азгәеиҭеит иара.
Ахада Иусбарҭаҟны есыҽны аусура ду цоит, аха уи атәы анҭыҵҟа зегьы ирбарҭам иҳәеит Гагәылиа.
"Уажәазы араҟа аус руеит 14-ҩык. Аусура иадҳаԥхьало рҟынтәи иаҳҭаху акы заҵәык ауп – аҟазара", ҳәа ациҵоит иара.
Алхас Гагәылиа иажәақәа рыла аус адулара иаҿуп асаит ҿыц, ҳаамҭазтәи аҭахрақәа ирықәшәо. Уаанӡа арҭ анапынҵақәа неигӡон Витали Чамагәуа.
Алхас Гагәылиа диит Гәдоуҭа 1971 шықәса рзы. 1988 шықәса рзы далгоит Гәдоуҭатәи ашкол, дҭалоит Москватәи анџьныр-ргыларатә институт.
Аԥсны жәлар Рџьынџьтәылатә еибашьра далахәылоуп. "Агәымшәараз" амедал ианашьоуп.
Дҭаацәароуп. Димоуп аԥа.
