АҞӘА, нанҳәа 4 — Sputnik, Рада Ажьиԥҳа. Аҟәа ақалақь акоммуналтәи авариатәи маҵзурақәа аԥсабаратә рыцҳара аԥыхразы аусурақәа ирҿуп. Иаԥҵоуп аштаб, ақалақь Ахада ихаҭыԥуаҩ Леон Кәарҷиа напхгара ззиуа. Абри атәы аарыцҳаит ақалақь Ахадара апресс-маҵзураҟынтәи.
"Ақалақь анапхгара, акоммуналтә маҵзурақәа ирылшо зегьы ҟарҵоит аҭагылазаашьа аҭышәныртәаларазы. Иаԥҵоуп аштаб, ақалақь Ахада ихаҭыԥуаҩ Леон Кәарҷиа напхгара ззиуа. "Амшынеиқәафымцамчи" "Аӡыканали" русзуҩцәа ақалақь ӡылеи фымцалеи реиқәыршәаразы аусурақәа ирҿуп", — лҳәеит Мадона Кәыҵниаԥҳа.
Лара лажәақәа рыла ауаажәларратә транспорт аныҟәара ԥкуп.
"Ақалақьтә транспорт аныҟәара уадаҩуп. Атроллеибусқәа рцынхәрас аус руеит автобусқәа. Амаршрутқәа ԥсахуп. Аӡы ахьыҟам ала иныҟәоит", — лҳәеит лара.
Ақәаршҩы иалагеит асааҭ 21:40 (мск) рзы.
