АҞӘА, нанҳәа 8 – Sputnik. Рио-де-Жанеиро имҩаԥысуа Аолимпиада раԥхьатәи амш аҽны урыстәылатәи адзиудоист Беслан Мудранов 60 килограмм зкапануа рыгәҭа аиааира илиршеит ҳәа аанацҳауеит Р-Спорт.
Аԥхьатәи амш азы 12 комплект амедалқәа ргаразы еисон ахыци ахәымпали рыла ахысразы, амаланыҟәаспорт азы, аҳәеилышьраҟны, дзиудо аҟны, ахысраҟны, аӡсараҟны, атлетика хьанҭаҟны.
Венгриеи Австралиеи рспортсменцәа иранашьахеит ахьтәы медалқәа ҩба-ҩба.
2012 шықәсазы Лондон имҩаԥысуаз Аолимпиадаҟны абри акатегориаҿы ахьы даԥсахеит Арсен Галстиан, уажәы — Беслан Мудранов.
"Даара сгәалаҟоуп. Ирацәаҩын урыстәылатәи аспортсменцәа амедалқәа згашаз, аха иҟаз аҭагылазаашьа зегьы ибзианы ижәдыруеит", — иҳәеит Мудранов.
Ҟабарда-Балкариатәи аспортсмен дыриааиит Нидерланды, Ермантәыла, Аладатәи Кореиа, Қырҭтәыла, Ҟазахсҭан рыспортсменцәа.
