АҞӘА, нанҳәа 9 – Sputnik, Бадраҟ Аҩӡба. Аԥсны агәабзиарахьчара аминистр инапынҵақәа назыгӡо Андзор Гоов апресс-конференциа мҩаԥигеит агәабзиарахьчара асистема ҿыц аиҿкаареи ашықәс актәи азыбжеи реихшьаалақәа рымҩаԥгара инарыдҳәаланы. Апресс-конференциаҟны аминистр иазгәеиҭеит агәабзиарахьчара асистема аилазаара ҿыц инақәыршәаны араионтә хәышәтәырҭақәа зегьы Агәабзиарахьчара аминистрра иаҵанакыроуп ҳәа.
"Араионтә хәышәтәырҭақәа зегьы Агәабзиарахьчара аминистрра иаҵаркны, аминистрра аштат еизырҳатәуп аусура еиҳа хра аманы имҩаԥысырц азы", — иҳәеит Гоов.
Гоов иажәақәа рыла асеиԥш аҭагылазаашьа аминистрра аусура акыр еиӷьнатәыроуп.
Апресс-конференциаҟны аминистр дазааҭгылеит ареспубликаҟны аҳәса рҽырбгара атәы.
"Уи ԥсҭазаарак ахҭнуҵо иҟазар, имҩаԥгатәуп ҳәа сгәы иаанагоит. Ԥсҭазаарак узеиқәырхозар апроцедура мҩаԥгатәуп. Ҩынтә-хынтә усеиԥш аҭагылазаашьа ҟалахьеит. Аҽакала азакәан ахысра ҟалом", — иҳәеит иара.
Андзор Гоов иара убасгьы иазгәеиҭеит ареспубликаҟны ашьа абанк шеиҿкаатәу.
Аминистр иҳәеит амашәыртә хҭысқәа раан ашьа рзымхо ишыҟалало.
Иара убасгьы проблеманы аминистр ишьоит ацхыраара ласқәа разымхара.
