АҞӘА 23 — Sputnik. 2024 шықәсазтәи Аолимпиада амҩаԥгаразы ақалақь алхра мҩаԥысраны иҟоуп 2017 шықәса цәыббрамзазы. Париж адагьы уи амҩаԥгаразы иқәгылоуп Рим, Будапешт, Лос-Анджелес. Абри атәы аанацҳауеит Р-Спорт.
"Макьаназы Париж аԥыжәара амоуп. Ақалақь аҟны аинфраструктура азыхиоуп. Атранспорт, асасааирҭақәа рганахьалагьы проблема ыҟаӡам. Уи адагьы 2024 шықәса рзы иҵуеит шәышықәса Париж аолимпиада мҩаԥысижьҭеи", ҳәа азгәҭоуп адырраҟны.
Ричард Макларен напхгаҩыс дызмоу Ихьыԥшым антидопингтә маҵзура (WADA) Урыстәыла адопинг амҩаԥгара аҳәынҭқарратә ҩаӡара амоуп ҳәа иҟанаҵаз ажәахә ашьҭахь WADA абжьагара ҟанаҵеит Рио-де-Жанеиро имҩаԥысуаз аолимпиадахь Урыстәыла акоманда зегьы ралахәхара аанкылазаарц. МОК анагӡаратә еилакы ԥхынгәы 24 рзы аӡбра аднакылеит иааидкылан акоманда анашьҭра акәымкәа аспортсменцәа алкааны инашьҭызарц.
Аолимпиада — 2024 аҳҭнықалақь алкаара мҩаԥысуеит 2017 шықәса цәыббрамзазы.
