ГАГРА, нанҳәамза 26 — Sputnik, Саида Жьиԥҳа. Нанҳәамза 26 инаркны 28-нӡа, Аԥсны аԥсыӡкреи ашәарыцареи рзы аспорт Афедерациа Бзыԥ аӡиас аҟны имҩаԥнагоит, цәгәырла аԥсыӡкразы аҩбатәи ареспубликатә чемпионат. Уи иалахәуп 55-ҩык Аԥсни Урыстәылеи рҟынтә аԥсыӡкыҩцәа.
"Ари аспорттә усмҩаԥгатә иалахәуп аԥышәа ду змоу Урыстәылатәи акомандақәа. Иаҳҳәозар Урыстәылеи Европеи адунеи ирчемпионхахьоу аԥсыӡкыҩцәа. Аԥсны ахьӡала ачемпионат иалахәуп акомандақәа быжьба, дара хҩык-хҩык аԥсыӡкыҩцәа рыла ишьақәгылоуп. Агәра ҳгоит, аԥышәа ду змоу ҳасасцәа ирыҵамхап ҳәа. Ачемпионат ахәшьара арҭоит 21-ҩык Урыстәылазегьтәии Жәларбжьаратәии аҩаӡара змоу аӡбаҩцәа", — иҳәеит Аԥсны аԥсыӡкреи ашәарыцареи рзы аспорт Афедерациа ахада Альберт Бондаренко.
Иахьа, Бзыԥ аӡиас аҳәырԥссара иатәым аҵакыраҟны иоурыжьит ачемпионат амҩаԥгара инамаданы 400 кьыла аԥсыӡ. Хыԥхьаӡарала иугозар 2000 цыра акалмаҳа. Аԥсыӡкра мҩаԥысуеит "икны иоужь" асистемала. Аԥсыӡкыҩцәа иркуа аԥсыӡ напыла иакьымскәа, аӡбаҩ ианирбаны, ааха амҭакәа иаразнак иоурыжьроуп.
Ачемпионат цонаҵы, аԥсыӡ ахьоурыжьуа аҭыԥ уахи ҽни рылаԥш ахуп, Аҩнуҵҟатәи аусқәа Бзыԥҭатәи аҟәша аусзуҩцәа.
Уи азы, ҷыдала Аԥсны аԥсыӡкреи ашәарыцареи рзы аспорт Афедерациа ахадара иҭабуп ҳәа рарҳәоит.
Ари ачемпионат Аԥсны имҩаԥысуеижьҭеит шықәсыки бжаки ҵуеит. Ари аамҭа иалагӡаны, Бзыԥ аӡиас аҟны иоужьуп 14 нызқьи бжаки цыра акалмаҳ.
Ачемпионат хырқәшахоит нанҳәамза 28 рзы. Уи аҽны еилкаахоит, аԥхьахәқәа зго аԥсыӡкыҩцәа рыхьӡқәа.
"Цәгәырла аԥсыӡкразы аҩбатәи ареспубликатә чемпионат ашьҭахь, нанҳәамза 29 рзы, ҳара имҩаԥаагоит фышықәса зхыҵуа инадыркны жәаашықәсанӡа зхыҵуа ақәыԥшцәа рыбжьарагьы ачемпионат", — ҳәа ациҵеит Альберт Бондаренко.
Ари аспорттә усмаԥгатә иабзоураны, ҳтәыла еиҳа иӡыргахеит. Иҳаҩсыз аӡынра мацара иалагӡаны ҳтәылаҟны имҩаԥысуа аԥсыӡкразы ачемпионатқәа рылахәцәа рабжьгарала, Гагра араион иаҭааит хәнызқьҩык инарзынаԥшуа асасцәа.
