АҞӘА, цәыббрамза 1 – Sputnik, Рада Ажьиԥҳа. Аҵарашықәс ҿыц азы ареспубликаҟны иҟоу ашколқәа 159 рҟынтәи 156 ашколхәыҷқәа рыдкылара иазыхиоуп. Абри атәы иҳәеит аминистр Адгәыр Какоба.
"Ҳара иҳаман 159 ҳәынҭқарратә школ, аха сынтәа хԥа аҳаркит: Гәылрыԥшь араион аҿы, ақыҭақәа Арадуи Аҽгәареи рыҟны. Арадуи Аҽгәареи рҟынтәи ахәыҷқәа Мықәтәи ашкол ахь ииагоуп, урҭ рзы атранспорт еиҿкаатәуп.
Иахьазы 156 школ азыхиоуп ахәыҷқәа рыдкылара", — иҳәеит Какоба.
Аминистр иажәақәа рыла ашколқәа жәпакы акапиталтә ремонт рҭахны иҟоуп, аиҳаракгьы ақыҭа школқәа.
"Иҟоуп ахыбрақәа 30-40 шықәса аремонт зымбац. Агәра згоит урҭ зегьы рзы иахәҭоу аԥара аԥшаара алҳаршап ҳәа. Аремонт хымԥада изҭаху ашколқәа рсиа атәыла аиҳабыра ирзынашьҭуп. Урҭ 50 ыҟоуп. Баграт Шьынқәба ихьӡ зху ашкол №1 аӡы аҵоуп, уаҟа аҟазаара шәарҭоуп. Ҳара иазыԥхьагәаҳҭоит уаҟа аремонт 2017 шықәсанӡа иҟаҳҵап ҳәа", — иҳәоит аминистр.
Апресс-конференциаҟны амаҵзура Sputnik Аԥсны Аҵара аминистрра ианаҭеит дара иаԥырҵаз анбаншәҟәқәа ашколқәеи ахәыҷбаҳчақәеи рҟны еихыршарц.
Аԥснытәи ашколқәа рҟны аҵара рҵоит 26 611-ҩык ахәыҷқәа
Аҵараҵара мҩаԥысуеит ԥшь-бызшәак рыла: аԥсшәа, аурысшәа, аерман бызшәа, ақырҭшәа. Аԥсуа школқәа— 60, аԥсуа-аурыс школқәа — 15, аурыс школқәа — 47, аерман школқәа — 26, ақырҭуа школқәа —11 ыҟоуп.
