АҞӘА, цәыббра 1 — Sputnik, Анжелика Бениаԥҳа. Александр Пушкин ихьӡ зху Аҟәатәи абжьаратә школ №2 аҟны раԥхьатәи аҵәҵәабжьы геит 155-ҩык ахәыҷқәа рзы. Абри атәы лҳәеит ашкол адиректор Ирина Повирскер.
"Иахьа иааиз ахәыҷқәа араҟа ироушт аҩызцәа бзиақәа, адыррақәа. Жәеиза шықәса рышьҭахь дара арантәи ицашт ҳтәыла иаԥсоу тәылауааны", — лҳәеит Повирскер.
Александр Пушкин ихьӡ зху Аҟәатәи абжьаратә школ №2 Аҟәа реиҳа зхыҵуа ашколқәа ирыҵаркуеит. 146-нтәуп иара ашәқәа актәи акласаа рзы иаатуеижьҭеи.
Цәыббра 1 азы аҩбатәи ашкол аҟны еизеит арҵаҩцәа, аҵаҩцәа, аҭаацәа иара убасгьы атәыла анапхгара рхаҭарнакцәа. Урҭ арахь иааиит арҵаҩцәеи аҵаҩцәеи Адырра амш рыдырныҳәаларц.
Аҵарашықәсҿыц рыдиныҳәалеит Аԥсны Аԥыза-министр ихаҭыԥуаҩ, афинансқәа рминистр Дмитри Сериков.
Раԥхьатәи аҵәҵәабжьы гаанӡа аиҳабыратә классқәа рҵаҩцәа актәи акласаа рнапаҿы иддыркит "Анбан" ашәҟәқәа.
Аныҳәа афырхацәа хадақәа – актәи акласаа рышәҭшьыҵәрақәа кны, рҭаацәа ирыцны иааиит. Иуадаҩуп аҳәара реиҳа згәы хыҭхыҭуаз ахәыҷқәа ракәу аҭаацәа ракәу.
Ашкол аҩналарҭа хадаҟны раԥхьаӡа акәны ашколахь иааиуаз ирԥылон сынтәа абри ашкол иалгараны иҟоу. Урҭ рнапқәа кны рыкласс уадақәа рахь инаргон.
