АҞӘА, цәыббра 1 – Sputnik, Роберт Џьапуа. Аԥсны асоциал-економикатә ҿиара ацхраараз Акомплекстә план иаҵанамкыз аҵара аобиектқәа рганахьала аԥаразоужьрақәа мҩаԥгахоит аҭыԥантәи абиуџьет аҟынтәи иҳәеит Аԥыза-министр Беслан Барцыц Аԥснытәи аҳәынҭқарратә лицеи-интернат аҭаараан.
"Иахьатәи амш рыдысныҳәаларц сҭахуп аҵаҩцәа, арҵаҩцәа, аҭаацәа. Ирацәоуп зыӡбра аҭахны иҟоу азҵаарақәа. Ара, алицеи аҟынгьы имаҷым апроблемақәа. Аҵыхәтәантәи акапиталтә ремонт ҟаҵан жәашықәса раԥхьа. Аҵара аминистрреи ҳареи ҳаидгыланы урҭ апроблемақәа раԥыхра ҳалҳаршап ҳәа агәра ганы сыҟоуп ашықәс аҩныҵҟала", — иҳәеит Барцыц.
Иара убасгьы иазгәеиҭеит Аԥсны асоциал-економикатә ҿиара ацхраараз Акомплекстә план иаҵанамкыз аҵара аобиектқәа рганахьала аԥаразоужьрақәа мҩаԥгахоит аҭыԥантәи абиуџьет аҟынтәи ҳәа.
Аԥснытәи аҳәынҭқарратә лицеи-интернат адиректор Лариса Қапԥҳа лажәақәа рыла иахьазы уа аҵара рҵоит 182-ҩык ахәыҷқәа. Араҟа аус руеит акружокқәа 10. Фҩык аинтернат аушьҭымҭацәа аҵара рҵоит Аолимпиатә резерв иатәу Санкт-Петербургтәи аколлеџь аҟны.
