АҞӘА, цәыббра 2 – Sputnik, Рада Ажьиԥҳа. Аҵареи аҭҵаарадырреи рминистрра аус аднаулеит абжьаратехникатә ҵаратә усҳәарҭақәа рыҿиараз аконцепциа. Абри атәы иҳәеит аминистр Адгәыр Какоба.
"Аибашьраани аибашьра ашьҭахьи абжьаратехникатә ҵаратә усҳәарҭақәа русура аанкылан. Уажәы ареспубликаҟны аус руеит ф-усҳәарҭак. Ааигәа ҳара урҭ рыҿиара аконцепциа аус адааулеит. Урыстәылатәи ҳколлегацәеи ҳареи ҳаиԥылараан абри азҵаара ҳалацәажәон. Урыстәыла аҵареи аҭҵаарадырреи рминистр ихаҭыԥуаҩ Александр Климов хаҭала иҳарбеит ҳколлеџьқәа рҭагылазаашьа, агәрагарагьы ҳаиҭеит акомплекс план ишаҵаркхо", — иҳәеит Какоба.
Аминистр иажәақәа рыла аколлеџьқәа рреконструкциа 600 миллион мааҭ артәоит.
"2018 шықәса инаркны ареспублика егьырҭ араионқәа рҟынгьы нап аҳаркуеит абжьаратехникатә ҵаратә усҳәарҭақәа реиҭашьақәыргылара", — иҳәеит аминистр.
Аминистр инаҵшьны иазгәеиҭеит урҭ рыҩаӡара ашьҭыхра ахәҭаны ишыҟоу.
