АҞӘА, цәыббра 8 – Sputnik, Бадраҟ Аҩӡба. НАТО амаӡаныҟәгаҩ хада Иенс Столтенберг Қырҭтәыла иаҭаара гуманитартә миссианы иҟам ҳәа азгәеиҭеит Аԥсны ашәарҭадаратә Хеилак амаӡаныҟәгаҩ Муҳамед Кьылба.
"НАТО иамоуп ахатәы арра-политикатә хықәкқәа. Урҭ арахь иаацԥхьаӡа Қырҭтәыла Аҩада Атлантикатә алианс алалара аус дырцыхцыхуеит. Ҳәарада уи ҳҳәынҭқарреи ҳхьыԥшымреи ашәарҭара иҭанаргылоит. Қырҭтәыла анапхгарагьы аҵакырадгьылтә акзааразы ирҳәац еиҭарҳәоит. Уи иаанагоит амчра ахамырхәараз аиқәшаҳаҭра ирыдаагало дара азыхиам ҳәа" — иҳәеит Кьылба.
Абри аҭакс аԥсуа ган ахатәшәарҭадаратә ҭагылазаашьа аҵакы рдуны Урыстәылеи иареи реизыҟазаашьақәа арӷәӷәалароуп.
НАТО амаӡаныҟәгаҩ хада Иенс Столтенберг Қарҭҟа дааит цәыббра 7 рзы. Авизит аҳәаақәа ирҭагӡаны аиԥылара мҩаԥысраны иҟоуп Аԥыза-министр Георги Квирикашьвилии, Қырҭтәыла апрезидент Георги Маргвелашьвилии, атәылахьчара аминистр Леван Изориеи, апарламент ахада Давид Усупашьвилии рԥылара.
Иара убасгьы Столтенберг дырԥылараны дыҟоуп астудентцәа. Қырҭтәыла Аԥыза-министр иазгәеиҭоит НАТО амаӡаныҟәгаҩ хада Қырҭтәылаҟа иаара иаанаго ара имҩаԥысуа адемократиатә реформақәа рыдгылароуп.
