АҞӘА, цәыббра 8 – Sputnik, Бадри Есиава. Аԥснытәи аҳәынҭқарратә университет аҟны имҩаԥысит ААУ жәларбжьаратәи аизыҟазаашьақәа рфакультет астудентцәеи Урыстәыла иҟоу Венесуела Ацҳаражәҳәарҭа аамҭалатәи агәрага Альвиро Енрике Кордерои. Урыстәыла иҟоу Венесуела Ацҳаражәҳәарҭа аамҭалатәи агәрага Альвиро Енрике Кордеро астудентцәа ҳамҭаны ириҭеит итәыла амилаҭтә фырхацәа ирызку ашәҟәы.
"Ари ашәҟәы рызкуп Венесуела арҿиара зыхәҭа алазҵаз амилаҭтә фырхацәа", — иҳәеит Альвиро Энрике Кордеро.
ААУ аҭоурыхтә факультет адеканат еиҿнакааит афотоцәыргақәҵа "По следам Чавеса", Боливариантәи ареспублика Венесуела апрезидент Уго Чавес изкны.
Асасцәа ҳаҭырла идикылеит ААУ аректор Алеко Гәарамиа, аԥсшәа раҳәо дықәгылеит Кавказ ашьхаруажәлар Рконфедерациа апрезидент Муса Шанибов.
"Иахьа араҟа еизеит иреиӷьӡоу астудентцәа. Арҭ аҟазареи аҟыбаҩи злоу ҿаруп, урҭ Аԥсны ԥхьаҟатәи аԥеиԥш амҩа арҭап ҳәа ҳгәыӷуеит", — иҳәеит ААУ аректор Алеко Гәарамиа.
Иара астудентцәа ирзеиҭеиҳәеит Венесуела ахьыԥшымреи ахақәиҭреи рахь инеирц изнысыз амҩа аҭоурых. Кордеро иакәзар ҭабуп ахиҳәааит адкылара ԥха ахьеиҿыркааз азы, иагьиҳәеит астудентцәа рахь ихы нарханы:
"Даара агәахәара снаҭеит аиспан бызшәа здыруа шәахьыҟоу. Ишәыдызгалоит бжьагарақәак: заҟа шәылшо ала ирацәаны шәаԥхьала, аинформациа шәашьҭаз, ишәыԥшаала, шәхы иашәырхәала. Уи хымԥада шәыԥсҭазаараҿы ишәыхәоит", — иҳәеит Урыстәыла иҟоу Венесуела Ацҳаражәҳәарҭа аамҭалатәи агәрага Альвиро Енрике Кордеро.
Аԥсуа студентцәа ирҭиуаз азҵаарақәа зегьы иахәҭаз аҭакқәа рзыҟаҵан. Иара убасгьы аиԥылараан идырбан Венесуела уаанӡатәи апрезидент Уго Чавес изку адокументалтә фильм "Мой друг Уго".
