АҞӘА, цәыббра 13 – Sputnik, Бадри Есиава. Аԥсны атәыла Ахада ихаҭыԥуаҩ Витали Габниа дидикылеит Урыстәылатәи Афедерациа Аҳәынҭқарратә Думахь акандидат Владимир Таимазов, аҩаша, цәыббра 13 рзы.
Витали Габниа иазгәеиҭеит асеиԥш аиԥыларақәа хра рыманы ишыҟоу, избанзар алхыҩцәа азин роуеит акандидат иҿцәажәара, ибара.
"Ҳтәылауаа рзы иманшәалоуп акандидат ипрограмма даналацәажәо, рызҵаарақәа аҭак анриҭо", — иҳәеит Габниа.
Урыстәылатәи Афедерациа Аҳәынҭқарратә Думахь акандидат Владимир Таимазов шьҭрала Аахыҵ Уаԥстәылатәуп. Иахьазы иара Санкт-Петербург иҟоу акультуреи аспорти рзы Амилаҭтә ҳәынҭқарратә университет аректорс дыҟоуп.
"Иааит аамҭа сдыррақәеи сԥышәеи аԥсҭазаараҟны схы иасырхәартә еиԥш, убри азы мацароуп адепутатрахь схы зықәсыргылаз", — иҳәеит Таимазов.
Витали Габниа иазгәеиҭеит Аԥсны анапхгарахь ала иахәҭаны иҟоу ацхыраара шыҟаҵахо.
Аԥсны 90 нызқьҩык рҟынӡа Аԥсны инхо, Урыстәыла атәылауаҩра змоу алхыҩцәа ыҟоуп, урҭ Урыстәыла Аҳәынҭқарратә думахь алхрақәа рхы рыладырхәырц азин рымоуп.
Алхрақәа рымш аҽны иаартызаауеит алхырҭатә ҭыԥқәа 9. Уи аҽны азы алхрақәа рхы рыладырхәыр ҟалоит Аԥсны иҟоу. Урыстәыла атәылауаа зегьы.
