АҞӘА, цәыббра 14 — Sputnik. Словениа ашьапылампылтә ассоциациа (NZS) аиҳабы Александер Чеферин УЕФА апрезидентс ихьӡ ҳәоуп, аиҿкаара имҩаԥнагоз аконгресс аҟны. Абри атәы аанацҳауеит Р-Спорт. УЕФА аиҳаб ҿыц иалхра мҩаԥысит цәыббра 14 рзы, Афины ақалақь аҟны. 55 бжьы рҟынтәи 42 Чеферин иҭан, иаанхаз 13 – Михаэл ван Прага иҭан.
Словениа ашьапылампылтә ассоциациа (NZS) аиҳабы Александер Чеферин (Aleksander Čeferin) диит жьҭаара 13 1967 шықәса рзы Лиублиане (Иугославиа).
1991 шықәса рзы аҵара даналга ашьҭахь аусура далагеит аҭаацәаратә фирма "Чеферин" аҟны (адукаттә еилахәыра). Иахьатәи аамҭазы афирма анапхгара дахантәаҩуп, аконтрольтә акциақәа иара икуп. Александер Чеферин аспорттә клубқәеи апрофессионалтә спортсменцәеи ринтересқәа ихьчоит.
2005-2011шш. рзы Чеферин акоманда "Любляна Лойерс" далахәын. 2006-2011 шш. рзы лиублиантәи аклуб "Олимпииа" анапхгара далахәылан.
2011 шықәса рзы Александер Чеферин Словениа ашьапылампылтә ассоциациа апрезидентс далхын. 2015 шықәса рзы иҿҳәара аҽа ԥшьы-шықәса иацҵан.
2016 шықәса рзы Александер Чеферин иӡбеит УЕФА апрезидентс икандидатура ықәиргыларц. УЕФА аиҳаб ҿыц иалхра мҩаԥысит цәыббра 14 рзы, Афины ақалақь аҟны.
Цәыббра 25 2015 шықәса рзы ФИФА уаанӡатәи ахада Иозеф Блаттер иганахьала азиназ Швеицариатәи афедералтә биуро ашьаус хацнаркит, иара уаанӡа УЕФА иахагылаз Мишель Платини 2011 шықәса рзы изакәанымкәа ҩ-миллион франк изиеигеит ҳәа ҵаҵӷәыс иҟаҵаны.
Аҭҵаарақәа мҩаԥысуанаҵы Мишель Платини инапынҵақәа аанижьит.
