Sputnik акорреспондент Лев Рыжков ацәыргақәҵа даҭааны дыҟан.
Ацәыргақәҵа мҩаԥысуан асасааирҭа "Рэдиссон Славянская" аҟны. Ацәыргақәҵа ауаа рацәа аҭааны иҟан. Арахь иааиз иара ус башауаамызт, урҭ малла-шьалла адунеи аҟны иаарылукаашаз ракәын. Аԥсны Амилаҭтә банк астенд ауаа рацәа зыдзыԥхьалаз акакәны иҟан ацәыргақәҵаҟны.
Арепортаж автор ацәыргақәҵа анаадырт ашьҭахь сааҭкҟа ааҵуаноуп уахь дышнеиз. Уи аамҭазы аԥсуа аԥсарқәа реиҳарак ргахьан.
"Фазиль Искандер 80-шықәса ихыҵра иазкыз аума, аинвестициатә хьтәы ԥсар аума, иаразнакы иаархәеит, лҳәеит Амилаҭтә банк адәныҟеимадаратә аҟәша аҟаза Лиана Агрԥҳа. – Уажәазы иаанханы иҟоу ҩ-аԥсар заҵәык роуп. Урҭ рыҩбагь Амилаҭтә банк аҵәахырҭаҟны ишьҭоуп. Егьырҭ – ахатәи акоммерциатәи коллекциақәа ирылоуп", ҳәа ацылҵеит ара.
Ацәыргақәҵа аԥхьатәи асааҭқәа раан иаахәан аԥсар "Гагра" ахыԥхьаӡарақәа зегьы.
Лиана Агрԥҳа иазгәалҭеит: "Аиҳарак аинтерес кны иаархәон "Исторические памятники Абхазии" иатәу асериа. Урҭ реиҳарак араӡны иалхуп, иҟоуп ихьӡырку мамзаргьы ахьыцқьа иалху. Хазы уазааҭгылар алшоит Афонҿыцтәи аԥсар. Уи аԥсарқәа зегьы иреиҳауп. Ахышәа-ҵышәа – 60 миллиметра иҟоуп", ҳәа.
Иара убас даара аинтерес рзаҵан аԥсар "Аиааира" ("Победа") аԥсар Аԥсны жәлар Рџьынџьтәылатә еибашьраҿтәи аиааира иазкуп. Ацәыргақәҵа аԥснытәи астенд аҟны ицәырган хкы рацәала "Отечественная война народа Абхазии" асериа. Асериа "Выдающиеся личности Абхазии" рызкуп Аԥснеиԥш адунеитә ҭоурых аҟны зышьаҭа аанзыжьыз акультуреи аполитикеи русзуҩцәа. Даара аинтерес аҵоуп аԥсар — "Александр Чачба". "Аԥсар араӡны иалхуп, Александр Константин-иԥа исахьа ануп, иара убасгьы ара иубарҭоуп Диоскураа рхылԥа. уи Аԥснытәи аҳҭынра иасимволны иԥхьаӡан", ҳәа Лиана Агрԥҳа иаҳзеиҭалҳәонаҵы аахәаҩцәа аԥсар иадҵаалон.
Ара иубарҭоуп ConIFA аныҳәамш иазкны иҭыжьу араӡынтә ԥсар. Уи –1000 екземплиар ыҟоуп. Ирацәаҩуп иаазхәарц зҭаху. Иара убас иаазхәарц зҭахыз рацәан аԥсар "Акуа". Аҳҭнықалақь 2500-шықәса азыҵра иазкны иҭыжьыз.
"Еиуеиԥшым аамҭақәа рзы ҳаҳҭнықалақь иахьӡын: Диоскуриада, Себастополис, Сухум-кале. Ҳара аԥсуа вариант ҳазааҭгылеит. Аԥсар хьӡыркуп", ҳәа еиҭалҳәоит Агрԥҳа.
Аԥсуа аԥсарқәа зегьы ҭыжьуп Санкт-Петербурги Москвеи.
Аԥсны Аҳәынҭқарра аԥсарқәа рдунеижәларбжьаратә цәыргақәҵаҟны агәадура унаҭартә ицәырган.
