АҞӘА, цәыббра 28 – Sputnik, Владимир Бегунов. Аԥсны аҳҭнықалақь аҟны имҩаԥысит Аԥсны Аиааиреи Ахьыԥшымреи рымшныҳәа иазку апарад арепетициа. Сынтәа апарад иалахәхоит ашьаҟ-ар рымацара, атехника апарад ахь икылыргоит хәы-шықәса рахь знык – аиубилеитә рыцхәқәа раан.
Арепетициа мҩаԥысит ҩ-етапкны: ашьыжь асааҭ ааба рзы ар ртәарҭаҟны, нас – асааҭ жәаба рзы, цәыббра 30 рзы апарад мҩаԥысраны иахьыҟоу Ахьӡ-аԥша апарк аҿаԥхьа.
"Аныҳәа амш аҽны асааҭ 11.00 рзы имҩаԥысраны иҟоуп иҭахаз Рмемориал аҿаԥхьа ашәҭшьыҵәрақәа рышьҭаҵара ацеремониа, асааҭ 12.00 рзы – апарад", — иҳәеит Атәылахьчара аминистрра апресс-маҵзура аиҳабы Роланд Џьоџьуа.
Атәылахьчара аминистр Мираба Кьышьмариа иазгәеиҭеит апарад амш зеиԥшразаалак ишымҩаԥысуа.
Роланд Џьоџьуа иҳәеит апарад ишалахәхо 450-ҩык асолдаҭцәеи аофицарцәеи. Иара убасгьы апарад иалахәхоит Аԥсны иҟоу Урыстәыла абжьбатәи арратә база аруаа.
