АҞӘА, цәыббра 29 – Sputnik, Рада Ажьиԥҳа. Самсон Ҷанба ипиесала арежиссиор Алхас Шамба иқәиргылаз аспектакль "Амҳаџьырқәа" апремиера мҩаԥысит Аԥсуа драматә театр асценаҟны цәыббра 28 рзы.
"Амҳаџьырқәа" актк змоу спектакльуп. Иалагоит аԥсуаа Аԥсны шроуз атәы зҳәо алегендала. Изыхцәажәо аԥсуаа ртрагедиа ду амҳаџьырроуп. 1864 шықәса рзы аԥсуа жәлар реиҳарак ахыган Ҭырқәтәылаҟа иган", — иҳәеит Алхас Шамба.
Иара иажәақәа рыла аспектакль иунаҭоит алшара ажәлар рҭоурых азхәыцраз, азхьаԥшраз.
"Амилаҭ доуҳа ахьчара аҭахуп еснагь. Иуадаҩу аамҭақәагьы еснагь урзыхиазароуп. Еиуеиԥшым аамҭақәа рзы аспектакль атеатр асценаҟны иқәыргылан. Уажәтәи ҳақәыргыламҭа аҽа знеишьоуп иамоуп, аҽакала ахәаԥшҩы идгалоуп", — иҳәеит Шамба.
Аспектакль ахәаԥшыҩцәа даара ибзианы ирыдыркылеит.
"19-тәи ашәышықәса аԥсуаа рзы акыр иуадаҩыз аамҭан. Арҭ аамҭақәа ирызку аспектакль раԥхьаӡа акәны избеит. Даара исгәаԥхеит", — лҳәеит ахәаԥшҩы Шарида Жьиԥҳа.
Аспектакль аус адырулон фымз инарзынаԥшуа.
"Амҳаџьырқәа" раԥхьаӡа акәны иқәыргылан 1928 шықәса рзы.
