КӘТОЛ, цәыббра 29 — Sputnik, Бадраҟ Аҩӡба. Ахақәиҭра Ашҭа аҟынтәи “Аҧсҭазаара амҩа” ҳәа хыс измоу автомашьынақәа рколонна аныҟәараан, изҭааз Кәтол ақыҭантәи ашколхәыҷқәа еиҿыркааит аконцерт. Абри атәы ааицҳаит автоколонна иацу Sputnik акорреспондент.
Аибашьра аветеранцәа гәахәарыла ахәыҷқәа инарыгӡоз ашәақәа рыцырҳәон, напеинҟьарыла рхы-ргәы азҭарҵон.
Ҩымш рыла аколлонна 200 километра иахысуеит, 50 рҟынӡа автомашьына алахәуп. Аиҿкааҩцәа ргәаанагарала акциа еиҳарак иззырхоу аҿар аибашьра аамҭеи аҭоурыхи радыԥхьалароуп.
Автомашьынақәа рколонна алахәылацәа, Сергеи Багаҧшь анышә дахьамадоу аҭыԥаҿы ашәҭ шьыҵәрақәа рышьҭаҵара ацеремониа мҩаҧыргоит. Иара убасгьы уи аҩыза ацеремониа мҩаԥгахоит Ахақәиҭра Ашҭаҿи Владислав Арӡынба анышә дахьамадоу аҳаҭгәын аҿи.
