АҞӘА, жьҭаара 7 – Sputnik, Бадраҟ Аҩӡба. Ԥҟаррада ақәԥара Аԥсназы иҿыцу спорт хкуп, иҳәеит аиааира згаз Александр Тәанба апресс-конференциаҿы.
"Атурнир даара ибзианы еиҿкаан. Аԥсны азы ари иҿыцу спорт хкуп, иара аҿиаразы атурнир амҩаԥгара даара акраҵанакуеит. Ҳара ҳаспортсменцәа жәларбжьаратәи аицлабрақәа рҿы рхы бзианы иаадырԥшуеит", — ҳәа ациҵеит иара.
Аицлабракәа ҳаракыла имҩаԥысит, избанзар рхы аладырхәит еицырдыруа аспортсменцәа.
"Аицлабрақәа рҽазыҟаҵара даара ицәгьан, 15 кьыла исыгхеит. Сгәы иаанагоит ари аспорт хкы знапы алаку еиликаауеит ас изыҟало. Аҽазыҟаҵарақәа цәгьала ҳдырааԥсон", — иҳәеит иара.
Тәанба иажәақәа рыла, Аԥсныҟа ацара анидыргала, иара дагьазымхәыцит.
"Сара Нальчикҟагьы сцар ҟалон, аха сара сгәы иаахәоит аԥсны ақәгылара алшара ахьсоуз, сҩызцәеи сыуацәеи ахьыҟоу", — ҳәа азгәеиҭеит аспортсмен.
Уԥсадгьыл аҿы уанеисуа, еиҳагьы имариоуп, избанзар ирацәаҩуп азгәыбылыҩцәа, ҳәа азгәеиҭеит иара.
Аицлабрақәа рхы аладырхәит ҩыџьа аԥсуа спортсменцәа. Енрик Агрба урыстәылатәи аиқәԥаҩ Магомед Абдурахимов дииааит.
Америкатәи ақәԥаҩ, грипплинг азы адунеи ҩынтәтәи ачемпион, ԥҟарада ақәԥаразы адунеи ачемпион Џьефф "Снеговик" Монсон Нхыҵ Уаԥстәылатәи аспортсмен Леуан Персаев ититул изимымҟьеит. Араундцҵа алҵшәақәа рыла аспортсменцәа еиваҟәалоит ҳәа ишьан.
Octagon Fighting Sensation (OFS) атурнирқәа мҩаԥысуеит 2009 шықәса раахыс еиуеиԥшым атәылақәа рҟны. Аҟәа атурнир мҩаԥысраны иҟоуп жьҭаара 6 рзы, ареспубликатә стадион "Динамо" аҟны.
