АҞӘА, жьҭаара 14– Sputnik, Бадри Есиава. Аԥснытәи аалыҵ екологиала зегь раасҭа ицқьоу аалыҵуп ҳәа азырҳәеит агроааглыхратә цәыргақәҵаҟны. Абри атәы иҳәеит аиԥылараан Урыстәыла иҟоу Аԥсны ахәаахәҭратә хаҭарнак Олег Барцыц.
“Ҳара ҳаарыхыҩцәа ҩаҧхьа аҧснытәи аалыҵ екологиала ишыцқьоу, хаҭабзиарала ишыҳараку шьақәдырҕәҕәеит. Ацәыргақәҵаҿы заалыҵ раҧхьаӡа акәны адгалара мҩаҧызгоз анаплакыҩцәа рхыҧхьаӡара, иааизакны уахәаҧшуазар, 2 нызқь инареиҳан. 31 инарзынаҧшуа аҧсуа брендқәа амедалқәа рыла иалкаан. Урҭ рахьынтә 14 “ахьтәы” медал ранашьан”, – ҳәа иҳәеит Олег Барцыц.
Иара иазгәеиҭеит аԥснытәи аалыҵқәа 31 амедалқәа шранашьаз, урҭ рҟынтәи 14 хьтәы медалқәоуп. Барцыц игәаанагарала асеиԥш иҟоу аҭагылазаашьа ареспублика аимидж акырӡа ишьҭнахуеит.
Аԥсны Ақыҭанхамҩа аминистр Даур Ҭарба ҭабуп ҳәа реиҳәеит агроааглыхратә цәыргақәҵа иалахәыз Аԥснытәи анаплакыҩцәа, иҳәеит агәыӷра шимоу ҽааны алахәылацәа иҵегьы еиҳахап ҳәа, аалыҵ ассортиментгьы еиҳа ирацәахап ҳәа.
Аԥсны Ахада Рауль Ҳаџьымба аҧснытәи аделегациа иргаз аиааира рыдиныҳәалеит. "Ари аихьӡара ҳаракы жәаҳәарада зегьы гәахәарыла иҳадаҳкылеит”, – ҳәа инаҵшьны иазгәеҭеит Рауль Ҳаџьымба.
Аҳәынҭқарра Ахада Рауль Ҳаџьымба, "2017 шықәсазы Аҧсны ақыҭанхамҩа Аминистрра иамоу афинанстә лшарақәа акырынтә еизырҳахоит”, – ҳәа инаҵшьны иазгәеиҭеит. Иара агәра диргеит усеиԥш алшарақәа шыԥшаахо азы. Убри азы, иазгәеиҭеит иара, Афинансқәа рминистрра иазнархиароуп иахәҭаны иҟоу апрограмма.
Аҧсны аекономика аминистр Адгәыр Арӡынба, Аҧсны 2017 шықәсазы аекономикатә ҿиара Апрограмма шеиқәыршәоу азы адырра ҟаиҵеит. “Аҳәынҭқарра иарбоу аплошьадка адагьы егьырҭ аиҧш-зеиҧшу аҭыҧқәа рҿы ахатә продукциа адгаларазы алшарақәа раҧҵара иадҳәалоу ахарџь ахахьы иагоит”, – ҳәа азгәеиҭеит аекономика аминистр Адгәыр Арӡынба.
XVIII урыстәылатәи агроааглыхратә цәыргақәҵа мҩаԥысуан 2016 шықәса, жьҭаара 5-8 рзы.
Аԥснытәи анаплакыҩцәа иранашьан амедалқәа 31, урҭ рҟынтәи ахьтәқәа 14.
