АҞӘА, жьҭаара 24 — Sputnik. Минсктәи аиҿцәажәарақәа альтернатива шрымам атәы азгәарҭеит аиҿцәажәара алахәылацәа зегьы Берлин имҩаԥысуаз реиԥылараан.
"Иазгәаҭатәуп Минсктәи аиқәшаҳаҭрақәа шынагӡам. Пунктқәак, аиҳарак аполитикатә хәҭа иаҵанакуа, украинатәи аган инанагӡароуп", — иҳәеит Урыстәыла Ахада ипресс-маӡаныҟәгаҩ Дмитри Песков.
Песков иара убасгьы иазгәеиҭеит Украина Ахада Петр Порашенкогьы дшазааҭгылаз аиҿцәажарақәа рҵакы.
Украинеи Урыстәылеи рҳәаа Киев анапаҵаҟахь ииагахоума ҳәа азҵаара аҭакс Песков иҳәеит "Ҳәарада. Уи аиқәшаҳаҭра апунктқәа ируакуп" ҳәа. Иара иргәалеиршәеит Урыстәыла Ахадагьы еснагь уи азҵаара дшалацәажәо.
Песков иазгәеиҭеит мызкы иалагӡаны еиԥылараны ишыҟоу аминистрцәеи атәыла Ахадацәа рыцхырааҩцәеи. "Иҟам даҽа мҩак аилацәажәарада. Аилибамкаарақәа мҩак рзыԥшаатәуп", — иҳәеит Песков.
ОБСЕ амиссиа рыҟазааразы азҵаара аҭакс Песков иазгәеиҭеит уи аидеиа аӡәгьы дшаҿамгыло.
