АҞӘА, абҵара 1 – Sputnik, Рада Ажьиԥҳа. Жьҭаара 31 рзы Аԥснытәи Аҳәынҭқарратә университет аҟны имҩаԥысит Китаитәи Жәлар Рреспубликаҟны иҟоу Аԥсны Аҳәынҭқарра Аҳаҭыртә консул Ге Чжилии астудентцәеи реиԥылара. Аиԥылараҟны ирылацәажәан акультуреи, атуризми, аҵареи, амедицинеи русхк аҟны Аԥсни Китаии русеицура аԥеиԥшқәа ртәы. Китаитәи Жәлар Рреспубликаҟны иҟоу Аԥсны Аҳәынҭқарра Аҳаҭыртә консул Ге Чжили дидикылеит ААУ аректор Алеко Гәарамиа.
"Аԥсни Китаии рыбжьара аҵыхәтәантәи аамҭақәа рзы ишьақәгыло иалагеит уаҩ дзеигәырӷьаша аимадарақәа. Иахьатәи ҳаиԥыларагьы уи шьақәзырӷәӷәо акакәны иҟоуп", — иҳәеит ААУ аректор Алеко Гәарамиа.
Аконсул Ге Чжили еиҭеиҳәеит Аԥсни Китаии русеицура ахырхарҭақәа ртәы.
"Ҳара иаҳгәиҭоуп акультуреи, атуризми, аҵареи, амедицинеи русхк аҟны Аԥсни Китаии русеицура ашьақәыргылара. Сгәы иаанагоит Аԥсынгьы китаитәи атауарқәа ахархәара рымоуп ҳәа", — иҳәеит Ге Чжили.
Адипломат иажәақәа рыла Китаи азыхиоуп аҵара аусхк аҟны аусеицуразы аиқәшаҳаҭра азырхиара.
"Астудентцәа реимдаразы аҭахрақәа ыҟан иҟазар, ҳара уи ҳазыхиоуп. Ҳара иҳалшоит Аԥснытәи астудентцәа Китаиҟа рцара аиҿкаара. Агәра згоит асеиԥш иҟоу аиныррақәа аинтерес шроуа астудентцәа рзы", — иҳәеит адипломат.
ААУ астудентцәа хкыдҵарыла изыӡырыҩуан асас, ирҭиуан азҵаарақәа, иалацәажәон ААУ-и Китаитәи аҵараиурҭақәеи ԥхьаҟатәи реинырра аԥеиԥш.
