Ииасыз амчыбжь азы еиҿкаан ареспублика Ауаажәларратә палата аилазаара ҿыц. Апалата иазыԥхьагәанаҭо аусура далацәажәеит лыҭо Ауаажәларратә палата амаӡаныҟәгаҩ ихаҭыԥуаҩ Данил Убириа.
Азакәан инақәыршәаны Ауаажәларратә палата аҿаԥхьа дҵаны иқәгылоу аграждантә еилазаара аҿиареи арӷәӷәареи рыцхраароуп. Абри инақәыршәаны еиҿкаауп акомиссиақәа: аграждантә еилазаара аҿиаразы, агәабзиарахьчаразы, ашәарҭадаразы, аԥсабара ахьчаразы, аекологиазы, аԥсуа бызшәазы, акультуразы. Зынӡа еиҿкаауп 15 комиссиа. Атәыла Ахада Рауль Ҳаџьымба иҳәеит азакәан инақәыршәаны Ауаажәларратә палата аусуреи абжьагарақәеи дышрыдгыло.
– Зегьы еицырдыруеит Ауаажәларратә палата ажәадгалақәа ҟанаҵар шалшо. Шәгәаанагарала Ауаажәларратә палата иаус хаданы иамоузеи?
– Ауаажәларратә палата атәыла анапхгареи аоппозициеи рыбжьара цҳак иаҩызаны иҟалароуп. Атәыла Апарламенти ҳареи шьаҿеиқәшәала аус еицааулароуп.
– Атәыла Ахада ишәыдигалеит аҳәынҭқарратә органқәа рҟны ауаажәларратә хеилакқәа аԥҵазарц. Уи аус шԥацо?
– Сара еснагьгьы абри аԥшьызгон. Иахьазы уи еиҳагьы аҵак ду аманы иҟоуп ҳәа исшьоит, аиҳаракгьы Агәабзиарахьчара аминистрраҿы, Аҩныҵҟатәи аусқәа рминистрраҿы. Уаанӡа ҳаԥшьгара адгылара аҭамызт. Уажәы атәыла Ахада ихаҭа иҳадигалеит ари.
– Ҿыц еиҿкаау палата ахырхарҭақәа шәрылацәажәахьоума?
– Уаҵәы имҩаԥысраны иҟоуп аилатәара. Уаҟа инагӡаны иаԥҵахоит акомиссиақәа реилазаара, иалххоит ахеилак ҿыц.
