АҞӘА, абҵара 16 – Sputnik, Анжелика Бениаԥҳа. 400-ҩык рҟынӡа злахәыз афорум аатит Аҟәа, абҵара 15 рзы. Абри атәы аанацҳаит Урыстәыла Аекономикатә ҿиара аминистрра апресс-маҵзура.
Афорум еицеиҿыркааит Аԥсны Аекономика аминистрреи Урыстәыла Аекономикатә ҿиара аминистрреи Урыстәыла Апрезидент Иусбарҭа адгыларала.
Афорум апрограмма рхы аладырхәит Аԥсны анапхгара, анагӡаратәи азакәанԥҵаратәи органқәа рхаҭарнакцәа, абизнесуаа, иеиҳабыратәым аиҿкаарақәа.
Арахь иааиит Аԥсны Ахада Рауль Ҳаџьымба, Урыстәыла Аекономикатә ҿиара аминистр ихаҭыԥуаҩ Александр Цыбульски, Аԥсны Аԥыза-министр Беслан Барцыц уҳәа ирацәаҩны.
Раԥхьаӡа акәны афорум иаҭааит Аахыҵ Уаԥстәыла аделегациа.
Аекономикатә форум аҵак ду аманы иҟоуп ареспублика иамоу апотенциал аарԥшразы, абизнес-партниорцәа дырбаразы.
Аекономикатә ҿиара апресс-маҵзура ишаанацҳауала аекономика ареалтә сектор аҿиара апрограммала аԥаразоужьра асхема абасеиԥш еиҿкаахоит: 10% анаплакҩы иалеигалоит, иаанхо — "Инвестагентство". Акредитқәа ҿҳәараны 10 шықәса рырҭоит. Аԥыжәара рымоуп акыршықәса анаплакытә ус иаҿу ауаа.
"Афорум аҟны анапы рыҵаҩуп аиқәшаҳаҭрақәа аԥхарратә комплекс "Кындыг-агро" 300 миллион аԥара аҭаразы, аилак "Зодиак" 75 миллион мааҭ аҭаразы, азауад "Зарубежкомплект" 55 миллион мааҭ аҭаразы, азауад "Осетр" 23 миллион мааҭ аҭаразы. Иааидкыланы Аинвестициатә ԥаразоужьра ахышәа-ҵышәа 450 миллион мааҭ артәоит", ҳәа арбоуп апресс-маҵзура адырраҟны.
