АҞӘА, абҵара 17 — Sputnik, Бадраҟ Аҩӡба. Аҵаратә документқәа наҟ-ааҟ реицазхаҵаразы аиқәшаҳаҭра апроект Москваҟа ишьҭуп, иҳәеит Аԥсны Аҵареи аҭҵаарадырреи рминистр Адгәыр Какоба, раԥхьатәи "Аԥснытәи аҵаратә салон" апленартә еилатәараҟны дықәгыло.
Уаанӡа асеиԥш иҟаз аиқәшаҳаҭра рыбжьарҵахьан Аԥсны Аҳәынҭқарреи Приднестровиатәи Ареспубликеи.
"Уаанӡа асеиԥш иҟаз аиқәшаҳаҭра ҳабжьарҵахьан Приднестровиатәи Молдавиатәи Ареспубликеи ҳареи. Уажәы Аминистрцәа Реилазаара ишьақәнарӷәӷәаз аиқәшаҳаҭра апроект Москваҟа иҳашьҭит", — иҳәеит аминистр.
Приднестровие Аҵара аминистр Татиана Цивинскаиа иазгәалҭеит анапы зҵаҩу аиқәшаҳаҭра ишарӷәӷәоу аҵаратә усҳәарҭақәа реинырра, русеицура.
"Аԥсны Аҵара аминистрреиҳареи акыр ҳаизааигәаны аус еицаауеит. Ааигәа ҳнапы зҵааҩыз, аҵаратә документқәа наҟ-ааҟгьы ҳаицазхаҵаразы аиқәшаҳаҭра шьаҿа бзианы иҟоуп", — лҳәеит лара.
Афорум аҽалархәразы Аԥсныҟа иааит Урыстәыла, Приднестровие, Аахыҵ Уаԥстәыла уҳәа рҵаратә усҳәарҭақәа рхаҭарнакцәа.
Абҵара 18 рзы имҩаԥысраны иҟоуп Аԥсны, Урыстәыла, ИАР атәылақәа рҵаратә еиҿкаарақәа рцәыргақәҵа аусура.
