Анаплакы аинвесторцәа ируаӡәку Реджаи Чакыр иажәақәа рыла, аргылара уаанӡагьы ахыркәшара рыгәҭакын, аха афинанстә уадаҩра иахҟьаны маҷк ихьшәаны аусура иалагеит.
Раԥхьатәи аҽаҩра роуит 2016 шықәса лаҵарамзазы. Ҭырқәтәылатәи аинвестор иҳәоит иара бизнес хаданы Ҭырқәтәыла имоу атуризм аусхк шакәу. Ақыҭанхамҩа уаанӡа инапы алакымызт. Арԥхарҭатә комплекс азы ажәа анидыргала акраамҭа ишәеит-изеит.
"Аԥсны ақыҭанхамҩа аганахьала алшарақәа рацәаӡоуп. Уи адагьы Аԥсныи Урыстәылеи еигәылацәоуп. Ҳара ҳаалыҵ аҟынтәи 90% уахь експорт ҳасабла иҳашьҭуеит. Урыстәыла аџьырмыкьа дууп", — иҳәоит Реджаи Чакыр.
Анаплакы зегьы голландиатәи амыругақәа рыла еиқәыршәоуп. Арԥхарҭа аизгаразы Ҭырқәтәылантәи аҟазауаа ааԥхьан. Асеиԥш иҟоу акомплекс иара Ҭырқәтәылагьы иҟам. Зегь маншәалоуп, акызаҵәык аԥхын аусуцәа ҳазхом, урҭ атуризм аусхк нап адыркуеит, иҳәеит Чакыр.
Иахьазы анаплак аҟны аперсонал 50 – 60-ҩык рҟынӡа иҟоуп.
"Аусуҩцәа реиҳараҩык аҭыԥантәиқәа роуп. Аԥхын Молдавиеи Узбеқисҭани рҟынтәи аусуҩцәа ҳадҳаԥхьалоит", — иҳәоит Чакыр.
Ҭырқәтәылатәи абизнес аԥсыуала
Араҟа иаадрыхуеит апатырџьан сорт хкы "Плаисанс", 90% аҽаҩра Урыстәылаҟа аҳәаа иахыргоит, 10% аҭыԥан ирҭиуеит.
Анаплакы ахышәа-ҵышәала аура 300 метра иҟоуп, аҭбаара — 200 метра.
Апатырџьан адқәа 75 — 114 метра инаӡоит. Апатырџьанқәа агитропонтә анаплакы агроном хада Асҭамыр Сақаниа иажәақәа рыла, асеиԥш апатырџьан ааӡара еиҳа феида амоуп, избанзар аҵиаа еснагь абааӡара амоуп, ахырҳага маҭәашьарқәа раҵаҵарагьы мариоуп.
"Анышә ус акә егьыс акә амч ацәыӡуеит", — иҳәоит Сақаниа.
Апатырџьанқәа еиҭарҳауеит ааԥын. Раԥхьатәи аҽаҩра ҩбаҟа мзы рышьҭахь иуоуеит. Апатырџьан жәла аӡахәеиԥш еизҳауеит, уажәы иара аура жәеиза метра инаӡоит.
"Ишахәҭоу еиԥш аус узадулар 15 метра рҟынӡа аракәа аунашьҭуеи шьаҭак иалшоит иаанашьҭыр 35 — 40 кьыла аҽаҩра. Ҳара ишазаԥхьагәаҳҭо ала ашықәсан иҭаагалароуп 2, 5 нызқь тонна аҽаҩра", — иҳәоит Сақаниа.
Амш анышәшьу афымцалашара рхы иадырхәоит афотосинтез азы. Уахынла аҵиаақәа рыԥсы ддыршьоит. Ахьҭақәа аныҟало арԥхарҭа аҩныҵҟа зегьы аҳауа 26 градус рҟынӡа ихаргалоит.
Пицундатәи арԥхагатә нхамҩаҟны рхы иадырхәо атехнологиа иалнаршоит зхаҭабзиара ҳараку, згьама бзиоу аалыҵ аиура, ҳәа азгәеиҭоит анаплакы агроном хада Асҭамыр Сақаниа.
