АҞӘА, абҵара 23 – Sputnik, Рада Ажьиԥҳа. Аԥсны Аминистрцәа Реилазаара аилатәараҟны аԥсахрақәа алагалан "Аԥсны Аҳәынҭқарра атәылауаа рпаспорт азы Аԥҟара". Уи инақәыршәаны апаспортқәа рхархәара аҿҳәара иацҵоуп 2018 шықәса ԥхынҷкәын 31 рҟынӡа. Абри атәы иҳәеит Аминистрцәа Реилазаара азинтә ҟәша аиҳабы Лаша Цаава.
"Уаанӡа иҳадаҳкылахьаз Аԥҟараҟны иарбан уажәы ҳхы иаҳархәо апаспортқәа рыҿҳәара 2017 шықәса ажьырныҳәа 1 азы инҵәоит ҳәа, аха атәылауаа рҭагылазаашьа арманшәаларазы ари арыцхә ҳнахеит 2018 шықәса ԥхынҷкәын 31 рҟынӡа", — иҳәеит Цаава.
Иара убри аан иазгәеиҭеит зыҿҳәара нҵәахьоу апаспортқәа рыԥсахра шаҭаху.
Аҩныҵҟатәи аусқәа рминистр Аслан Кобахьиа иҳәеит апаспортқәа хымԥада сынтәа рыԥсахра аҭахны иҟам ҳәа.
"Ҩышықәса рыҩныҵҟа ауааԥсыра ырманшәаланы апаспортқәа ҳаԥсахуеит. Ажәытә паспорт аус шауагьы изҭаху иԥсахыр ҟалоит аҿатә аҿырԥшы ала, избанзар иара адунеижәларбжьаратә стандартқәа ирықәшәо ишьақәыргылоуп", — иҳәеит Кобахьиа.
