АҞӘА, ԥхынҷкәын 7 – Sputnik, Бадраҟ Аҩӡба. Аԥсны Ахада Рауль Ҳаџьымба ахаша, ԥхынҷкәын 7 рзы Ауаажәларратә палата аилазаара ҿыц дырԥылеит. Аиԥылараан иара иҳәеит Ауаажәларратә палата азакәанқәа рпроектқәа аекспертиза иахрыжьлароуп ҳәа.
"Ари аԥышәа хацырктәуп. Ауаажәларраҿ иҳадаҳкыло азакәанқәа рдыруазароуп. Ауаажәларратә палатагьы абри алзыршо органы иҟалароуп", — иҳәеит иара.
Ауаажәларратә палата амаӡаныҟәгаҩ Наҭелла Акаԥҳа илҳәеит атәыла Ахада ииҳәаз дшадгыло, хымԥада аҵакы зманы иҟоу азакәанқәа рпроектқәа аԥхьа Ауаажәларратә палатаҟны рылацәажәара шымҩаԥгалатәу.
"Сара исҳәар сҭахуп Ауаажәларратә палата ахеилак аӡбрала ҳара Аԥыза-министри Апарламент аиҳаби рахь аофициалтә шәҟәқәа шынаҳашьҭыз, асоциал ҵак змоу азакәанқәа рпроектқәа аус рыдулара Ауаажәларратә палата алахәылацәагьы аладырхәырц азы", — лҳәеит лара.
Наҭелла Акаԥҳа иазгәалҭеит апалатаҿы акомиссиақәа шаԥҵоу.
"Аԥыза-министр абри азы адырра иаҳҭахьеит. Дҳақәшаҳаҭуп", — лҳәеит лара.
Ауаажәларратә палатаҿы азакәанқәа рпроектқәа рылацәажәара аҭыԥ змоу аибарххарақәагьы аԥнахыр алшоит ҳәа иазырыԥхьаӡеит аиԥылара алахәылацәа.
