Sputnik, Амра Амҷԥҳа.
Араион ҿыц амҩақәа руак, Севернаиа аҟны, хатәы ҩнык ашҭаҟны 37 шықәса еизҳауа игылан абри аԥсаӡ.
"Сара ажәабатәи акласс аҟны стәан саб абри аԥсаӡ ҳашҭаҟны ианеиҭеиҳаз, — лҳәоит Марина Аведиан. – Иуҳәар алшоит сыԥсҭазаара абжа сыбла ихгылан ҳәа".
1979 шықәса рзы Карекин Аведиан, Марина лаб, еиҭеиҳаит иашҭа акәакь аҟны Кәыдрытәи аиҩхааҟынтәи иааигаз аԥсаӡ хәыҷы. Ишнеи-шнеиуаз аҵла рыҩны иҩахыҳәҳәо аҟынӡа иазҳаит. Аӡын уи иԥшӡаӡа асы ақәнауан, аԥхын ашәшьыра рнаҭон. Иҟаларын иара аҽа акраамҭагьы усеиԥш имҩасыр, аха Марина илаҳаит Араион ҿыц аҟны идыргылалоз аԥсаӡ ԥсахтәуп, аҿыц аахәатәуп ҳәа.
Марина илыӡбеит араион ахәыҷқәеи ауааԥсыреи аныҳәа рзыҟалҵарц, ҳамҭас абри аԥсаӡ рылҭарц.
Аҳҭнықалақь "Аиаҵәара аусбарҭа" аусзуҩцәа рымчала аԥсаӡ наган аҭыԥаҿ иргылан. Марина Аведиан лакәзар, аԥсаӡ дахьахәаԥшуа агәадура лызцәырҵуеит: хымԥада смоҭацәа сыманы арахь сааиуеит – ҳәа лҳәоит.
Аҳҭнықалақь Ахадара Акультура аусбарҭа аиҳабы лхаҭыԥуаҩ Ҭимур Кәакәасқьыр Марина Аведиан иҭабуп ҳәа леиҳәеит иҟалҵаз аҳамҭазы.
Марина лҳамҭа акәзар хәыҷгьы-дугьы ақәгәырӷьо иԥшӡаӡа игылоуп.
