АҞӘА, ԥхынҷкәын 26 — Sputnik, Бадри Есиава. Урыстәылатәи Афедерациа арратә дирижиор хада Валери Халилов еснагь ацхыраара аиҭон Аԥсны Атәылахьчара арратә оркестр иҳәеит Аԥсны Атәылахьчара аминистр ихаҭыԥуаҩ Нодар Ԥлиа.
"Иара еснагь иҳаиҳәон иаҭахны иҟоу ацхыраара аҭара дшазыхиаз. Аҵыхәтәантәи аамҭақәа рзы ҳалацәажәахьан аинструментқәа ҳзаашьҭра азҵаара", — иҳәеит Ԥлиа.
Нодара Плиа иажәақәа рыла Валери Халилови иареи еибадырит шықәсқәак раԥхьа. Игәалашәараҟны даанхеит ауаҩы раз, агәыҳалал иеиԥш, аиҳаракгьы зыпрофессионалтә ҟазара ҳаракыз аӡәы иакәны.
Аԥсны Атәылахьчара аминистрра арратә ансамбли Урыстәыла арратә ансамбли русеицура дазааҭгылеит адирижиор Давид Терзиан.
Терзиан иажәақәа рыла Валери Халилов еснагь ареспубликаҿтәи акультуратә ԥсҭазаара дазҿлымҳан.
"Хымз раԥхьа ҳаштаб аиҳабы Хрулиов инапала Валери Михаил-иԥа иаҳзааиҭиит анотатә материал, апартитурақәа, адискқәа", ҳәа еиҭеиҳәоит Терзиан.
Давид Терзиан иҳәеит Халилов ицхыраарала Аԥснытәи аоркестр хәыда-ԥсада аинструмент ҿыцқәа роураны ишыҟаз.
"Ҳазҭало ашықәс мшаԥымзазы ҳара аинструмент ҿыцқәа ҳарзыԥшын. Уи аганахьала аусурақәа мҩаԥысуеит", — иҳәеит иара.
Валери Михаил-иԥа Халилов — урыстәылатәи адирижиор, акомпозитор, Урыстәылатәи Афедерациа акомпозиторцәа Реидгыла алахәыла, аинрал-леитенант диит ажьырныҳәа 30 1952 шықәса рзы.
Аҵыхәтәантәи адыррақәа рыла аҳаирплан иҭан 84 апассаџьырцәеи ааҩык аекипажи.
