АҞӘА, ԥхынҷкәын 28— Sputnik, Бадраҟ Аҩӡба. Аԥсны Ахада Рауль Ҳаџьымба 2016 шықәсазтәи аусура аихшьаалақәа ирызкны апресс-конференциа мҩаԥигеит. Апресс-конференциаҟны атәыла Ахада иҳәеит ҳаԥхьаҟа дарбанызаалак Ахада ҿҳәарак иманы далхлатәуп ҳәа.
"Ҳажәлар хаҿык акраамҭа ибара рцәыуадаҩуп. Аус бзиа ҟауҵеит –уи аҽаӡәы имадара улырша, аиҳаракгьы ақәыԥшцәа. Урҭ ҳара ҳаасҭагьы аусура рылшоит", — иҳәеит иара.
Алхрақәа рзы азакәанԥҵарақәа рахь аԥсахрақәа дрылацәажәо Ҳаџьымба иҳәеит урҭ аԥсахрақәа аҭахны иҟоуп ҳәа.
"Дарбанызаалак ацәгьа зухьоу ауаҩы мамзаргьы анаркотикатә маҭәашьарқәа здызкыло ҳәа иҟоу, Апарламент ахь рнеира алмыршахароуп. Ус џьаргьы иҟаӡам", — иҳәеит иара.
Адепутатцәа русура дазааҭгыло Ахада иҳәеит, урҭ рыбжьара ишыҟоу цәгьарак рымузаргьы ареспубликазы изакәызаалак ихәарҭоу ак ҟазымҵаз ҳәа. Иара иазгәеиҭеит Апарламент адепутатцәа рҭакԥхықәра еиҳатәтәуп ҳәа.
"Апарламент ахь унеиуазар, узызнеиуа удыруазароуп. Апарламент ахь инеиуа азакәанқәа еиқәиршәозар, еиҿикаауазар ауп ауаа ирыхәартә еиԥш", — иҳәеит Ҳаџьымба.
Иара иҳәеит иара убасгьы адепутатцәа рыстатусгьы аԥсахрақәа аҭахны иҟоуп ҳәа.
Атәыла Ахада игәаанагарала адепутатцәа русура иааидкыланы атәылаҿ аԥсҭазаара анырра ӷәӷәа анаҭоит.
