АҞӘА, ажьырныҳәа 23 — Sputnik, Бадри Есиава. Атуристцәа Мрагыларатәи Аԥсны иадуԥхьаларц азы араҟа еиҿкаатәуп еиуеиԥшым агәырҿыхагатә центрқәа, ауаа аамҭа ахьырхыргаша аҭыԥқәа иҳәеит арадио Sputnik аинтервиу аҭо Аԥсны Акурортқәеи атуризми рзы аминистр ихаҭыԥуаҩ Асҭамыр Ахба.
Аурыс текст авариант шәаԥхьар шәылшоит абра>>
"Аиҳаракгьы асезонбжьараан, аҳауатә ҭыгылазаашьа анҷыдоу, аԥсшьаҩцәа ирҭахуп раамҭа рхыгаразы агәырҿыхагатә программақәа" — иҳәеит Ахба.
Ахба иара убри аан иациҵеит апроблемақәа шырацәоугьы атуристцәа Мрагыларатәи Аԥсны ахәҭа аҭаара ргәаԥхо ишыҟоу. Уи аиҳаракгьы изыхҟьо маҷ-маҷ акәзаргьы араион аинфраструктура аҿиара амҩа иахьану ауп. Уи адагьы ара ирацәоуп атыҩша-ӡритә ӡыхьқәа.
Аминистр ихаҭыԥуаҩ ишиҳәо ала Аԥсны мраҭашәара иахьаҵанакуагьы аинфраструктура еиҳа-еиҳа иҿиоит, ҳаамҭа иақәшәартә еиԥш.
