Виачеслав Бигәаа: аҭҵаарадырра анапалакра ашкол санҭаз аахыс гәҭакны исыман

© Фото : из архива Руслана ХашигВиачеслав Бигуаа
Виачеслав Бигуаа - Sputnik Аҧсны
Анапаҵаҩра
НовостиTelegram
Еицырдыруа аԥсуа ҵарауаҩ, афилологиатә наукақәа ркандидат Виачеслав Бигәаа 60 шықәса ихыҵит.

АҞӘА, ажьырныҳәа 23  – Sputnik, Бадраҟ Аҩӡба. Аҭҵаарадырра анапалакра ашкол санҭаз аахыс гәҭакны исыман иҳәеит еицырдыруа аԥсуа ҵарауаҩ, афилологиатә наукақәа ркандидат  Виачеслав Бигәаа ҳкорреспондент даниҿцәажәоз.

"Усҟан иалкаан исыздыруамызт иарбан хырхарҭоу ишьҭысхуа, аха ауниверситет санҭала уи маҷ-маҷ сазнеиит. Ауниверситет аҟны сҵара аныхсыркәша ашьҭахь исыман алшара бзиақә аусуразы, аха уи мап ацәкны адунеитә литература Аинститут аспирантурахь схы сырхеит", — иҳәоит Виачеслав Бигәаа. 

Виачеслав Бигәаа — алитератураҭҵаара аусхк аҟны хәызмаӡам  аусумҭақәа дравторуп иҳәоит АБИГИ алитература аҟәша аиҳабы Мушьни Лашәриа.

"Раԥхьа иргыланы исҭахуп ҳҩыза ду имшира идысныҳәаларц.  60-шықәса рацәак идуум қәроуп, еиҳаракгьы аԥсуа изы. Виачеслав ажурнал «Алашара» аҟны аус иуан, ҳала ишабоз деизҳаит. Данқәыԥшыз инаркны алитература дазҟазан", — иҳәеит иара.

© Фото : из архива Руслана ХашигВячеслав Бигуаа
Вячеслав Бигуаа - Sputnik Аҧсны
Вячеслав Бигуаа

Виачеслава Бигәаа илагала ада аԥсуа литературадырра ахаҿы аагара уадаҩуп ҳәа азиҳәеит Лашәриа.

"Илшо џьоушьап. Иара ахӡыргара бзиа изымбо уаҩԥсуп. Агәра згоит ԥхьаҟагьы ҳлитература ашьақәгылара иацхрааша иакәны дшыҟоу, ишилшо", — иҳәеит Лашәриа.

АбИГИ афольклор аҟәша аусзуҩ, алитератураҭҵааҩ, акритик Владимир Агрбагьы дихцәажәеит Виачеслав Бигәаа.

"Адунеитә литература Аинститут даналга ашьҭахь  аԥхьа акандидаттә усумҭа ихьчеит, нас – адоктортә. Иахьа уажәраанӡагьы иара убри аинститут аҟны аус иуеит.  Виачеслав Бигәаа аԥсуа ҭоурых роман иазкны арҿиамҭа шьахәқәа аԥиҵахьеит. Дрылахәуп ҳаинститут аҟны иҭрыжьуа аусумҭақәа разырхиара. Аԥсуа литературеиԥш адыга литературагьы инапы алакуп. Гәыкала идысныҳәалоит имшира", — иҳәеит Агрба.

Виачеслав Бигәаа— афилологиатә наукақәа дыркандидатуп, РАН А. М. Горьки ихьӡ зху ИАР (СНГ) ИМЛИ алитература аҟәша аусзуҩ еиҳабыс дыҟоуп. 1980 шықәса рзы Виачеслав Бигәаа ААУ далгеит. 1982–1984  шықәсқәа рзы ажурнал "Алашара" аҟны аус иуан. 1984–1987 шықәсқәа рзы Москва, аспирантураҿ аҵара иҵон. 1988 шықәса рзы ихьчоит акандидаттә диссертациа, 2003 шықәса рзы – адоктортә диссертациа. 1990 шықәса раахыс аус иуеит адунеитә литература Аинститут аҟны.

Ажәабжьқәа зегьы
0