АҞӘА, ажьырныҳәа 25 — Sputnik, Амра Амҷԥҳа. Аԥсни Урыстәылеи рҟынтәи 70-ҩык рҟынӡа акәашаҩцәа алахәхараны иҟоуп жәабран 5 рзы Аҟәа имҩаԥысраны иҟоу абреикинг азы ачемпионат. Абри атәы ҳкорреспондент илзеиҭеиҳәеит аиндаҭлара аиҿкааҩы Рустам Шаков.
Ачемпионат мҩаԥысраны иҟоуп х-номинациак рыла: ахәыҷтәы (keeds), акомандатәи ("крю на крю") ахалахаҭатәи (b-boy), ахԥатәи аноминациа – "король танцпола".
Ачемпионат мҩаԥысуеит мышкы ахы-аҵыхәала, жәабран 5 рзы. Ажиури иалахәхоит Аҟәатәи абреик-данс акәашаҩцәа ҩыџьа, Урыстәылантәи апрофессионал кәашаҩцәа ҩыџьа.
Амузыкатә мҩаԥгара еиҿикаауеит Лазаревск инхо израильтәи адиджеи Rabbit.
Бреик-данс азы Аԥснытәи акоманда "Апсны-крю" ачемпионат иалахәхоит. Рустам Шаков иажәақәа рыла бреик-данс Аԥсны аҿар ирылаҵәаны иҟоуп, ԥшьышықәса зхыҵуа ахәыҷқәагьы уи рҽаладырхәуеит. Иара ихаҭа быжь-шықәса анихыҵуаз бреик-данс акәашара далагеит.
"Аха усҟани уажәи иҟоу геи-шьхеи рыбжьоуп", — иҳәеит иара.
Сынтәа фышықәсоуп абреикинг азы ачемпионат Аԥсны имҩаԥысуеижьҭеи.
