АҞӘА, ажьырныҳәа 27 – Sputnik, Владимир Бегунов. 2017 шықәса рзы Аԥсны Акурортқәеи атуризми рзы аминистрра иагәҭакуп закәандарыла аекскурсиақәа мҩаԥызго рзы ахараԥса-штрафқәа ҳараркырц: 1800 мааҭ инаркны 30 нызқь мааҭ рҟынӡа. Абри атәы астол гьежь аҟны иҳәеит аминистр Авҭандил Гарцкиа.
Аминистр иажәақәа рыла аусбарҭа хықәкны иамоуп атуризм аусхк ҭышәынтәалан аҟаҵара.
"Ирацәаҩуп атурфирмақәеи дареи аиқәшаҳаҭрақәа рыбжьамҵакәа зхаԥышәала аус зуа аекскурсиамҩаԥгаҩцәа. Ҳара агәаҭарақәа мҩаԥаагараны ҳаҟоуп", — иҳәеит иара.
Аминистр иҳәеит ари згәамԥхо шырацәахаша, аха аҽа мҩак ыҟаны ишимԥхьаӡо.
Уаанӡа астол гьежь аҟны ирҳәахьан аекскурсиамҩаԥгаҩцәа рзы акатегориақәа шаԥҵахо, аԥышәарақәа рҭир шакәхо.
"Аекскурсиамҩаԥгаҩцәа ареспублика иахаҿуп. Ҳара иаҳҭахым зтәыла аҭоурых цқьа иззымдыруа аусуҩцәа", — иҳәеит аминистр.
Аминистр ихаҭыԥуаҩ Асҭамур Ахба иакәзар иазгәеиҭеит аинтернет ишҭаҵахо аекскурсиамҩаԥгаҩцәа реестр.
