АҞӘА, жәабран 6 – Sputnik, Роберт Џьопуа. Джопуа. Ашахмат азы РГСУ XIII Ахраҿа Moscow Open-2017 амҩаԥысраан Аԥсны ашахмат арҿиараҿ илагалазы FIDE Кирсан Илиумжинов Аԥсны ашахмат азы Афедерациа аиҳабы Константин Ҭыжәба адиплом ианеишьеит.
"Ҳаиԥылараан ҳара ҳалацәажәеит Аԥсны ԥхьаҟагьы ашахмат аҿиара азҵаара. Илиумжинов иазгәеиҭеит аԥсуа шахматасыҩцәа активла аиԥылара ралахәра, иара убасгьы иара ҭабуп ҳәа ахиҳәааит атәыла анапхгара абри аусхк аганахь ала иҟанаҵо адгылара. Аиԥылараан FIDE апрезидент хаҭала сара исаҭәеишьеит ареспубликаҿ ашахмат аҿиараз адиплом. Ҳаиԥылара далахәын Москватәи аԥсуа диаспора ахантәаҩы Беслан Агрба", — ҳәа Sputnik иазеиҭеиҳәеит Константин Ҭыжәба.
FIDE апрезидент Илиумжинов иазгәеиҭеит Константин Ҭыжәба илагала ду ашахмат аҿиараҿы.
"Аԥснытәи акоманда ҩеижәаҩык инаӡон. Урҭ рҟынтәи 16-ҩык ареспублика ашколқәа рҵаҩцәа ракәын. Кирсан Илиумжинов урҭ дырԥылеит. Акраамҭа еицәажәон. FIDE апрезидент Кирсан Илиумжинов агәахәара инаҭеит жәабран 1 инаркны Аҟәатәи ашколқәа рҟны ашахмат азы афакультативтә зыҟаҵара алагалахоит ҳәа иоуз аинформациа", — иҳәеит Ҭыжәба.
РГСУ ашахмат азы XIII Ахраҿа Open-2017 мҩаԥысуан ажьырныҳәа 27 инаркны жәабран 5 рҟынӡа. Иара иалахәын шәҩыла адунеи аспортсменцәа.
