АҞӘА, жәабран 7 – Sputnik, Бадраҟ Аҩӡба. Валери Кәарҷиа Аԥсны аекономикатә наукақәа рахь илагалақәа иреиҳаны иҟоуп аграртә економика аҭҵаара иҳәеит аекономикатә наукақәа рдоктор, апрофессор Заур Шьалашьаа.
"Иахьазы Аԥсны реиҳа иактуалны иҟоу аграртә економикоуп. Кәарҷиа иазиԥхьаӡоит атрадициатә культурақәа: ачаиааӡара, аҭаҭынаарыхра, ахәшатә ҵиаақәа рааӡара хымԥада еиқәырхатәуп ҳәа. Урҭ асовет аамҭақәа раан иалдыршон аекономика қәҿиарала арҿиара. Аԥсны иахәҭоу аҳауатә ҭагылазаашьақәа зегьы ыҟоупурҭ акультурақәа рырҿиаразы" — иҳәеит Шьалашьаа.
Иара иажәақәа рыла Кәарҷиа иазиԥхьаӡоит атрадициатә культурақәа, ацитрус шәырқәагьы абрахь иналаҵаны, хымԥада нап рыдкылатәуп ҳәа.
"Ацитрус плантациақәа еиҭашьақәыргылатәуп. Урҭ реиҳарак ажәит. Уи адагьы Аԥсны азы хра рымоуп ауҭраҭыхаарыхра, арахәааӡара аусхкқәа. Абарҭ зегьы Кәарҷиа дрыхцәажәеит "Стратегиа социально-экономического развития Абхазии до 2025 года аззырхиоз агәыԥ иадигалаз ажәадгалаҿы", — иҳәеит Шьалашьаа.
Валери Кәарҷиа диит жәабран 7 1947 шықәса рзы. Аекономикатә наукақәа дыркандидатуп, "Ахьӡ-Аԥша" III аҩаӡара аорден ианашьоуп. Аԥсны ажурналистцәа Реидгыла далахәылоуп 1991 шықәса раахыс.
1998 шықәса раахыс Аҟәатәи Иаарту аинститут аректорс дыҟоуп. 120 инареиҳаны наукатә усумҭа дравторуп.
