АҞӘА, жәабран 8– Sputnik, Роберт Џьопуа. Ҟрыми Аԥсныи ахәаахәҭра-економикатәи, анаука-техникатәи, агуманитартәи усхк аҟны русеицуразы акомиссиа аԥснытәи ахәҭа напхгара аиҭоит Аԥсны Аԥыза-министр ихаҭыԥуаҩ Беслан Ешба.
Аминистрцәа Реилазаара Аппарат анапхгаҩы Диана Ԥлиаԥҳа иазгәалҭеит 2016 шықәса мшаԥымзазы Ҟрыми Аԥсныи рыбжьара анапы зҵаҩыз Аиқәшаҳаҭра инақәыршәаны ишеиҿкаау абри акомиссиа.
Аԥыза-министр ихаҭыԥуаҩ Беслан Ешба напхгара зиҭо акомиссиа иалахәхоит: Адгәыр Арӡынба —аекономика аминистр, Ельвира Арсалиаԥҳа —акультура аминистр, Даур Ҭарба – ақыҭанхамҩа аминистр, Автандил Гарцкиа – акурортқәеи атуризми рминистр, Кан Ҭаниа – Адәныҟатәи аусқәа рминистр ихаҭыԥуаҩ, Роберт Габлиа — атранспорт азы аҳәынҭеилакы аиҳабы, Геннади Гагәылиа –Аԥсны ААП (ТПП) апрезидент.
2016 шықәса мшаԥымзазы Иалта имҩаԥысуаз жәларбжьаратәи аекономикатә форум аҟны Ҟрыми Аԥсныи рнапы аҵарҩит ахәаахәҭра-економикатәи, анаука-техникатәи, агуманитартәи усхк аҟны аусеицуразы Аиқәшаҳаҭра.
