ААК апарламенттә алхрақәа рыҽрылархәразы адокументқәа рыдкылара хнаркәшеит

© Sputnik / Томас ТхайцукАԥсны Ацентртә алхратә комиссиа
Аԥсны Ацентртә алхратә комиссиа - Sputnik Аҧсны
Анапаҵаҩра
Аԥсны Жәлар Реизара-Апарламент адепутатс зкандидатурақәа ықәзыргыло рсиа хыркәшақәа шьақәырӷәӷәахоит хәажәкыра 2 рзы.

АҞӘА, жәабран 21 – Sputnik, Бадраҟ Аҩӡба. Аполитикатә партиақәеи аԥшьгаратә гәыԥқәеи рҟынтәи адокументқәа рыдкылара хыркәшоуп, ҳәа Sputnik Аԥсны адырра арҭеит Аԥсны Ацентртә алхратә комиссиаҟны.

"Иааидкыланы иҭаҩуп адепутатрахь акандидатцәа ҳәа 139-ҩык. Урҭ рҟынтәи аполитикатә партиақәа рҟынтәи иқәгылоуп 25-ҩык акандидатцәа, аԥшьгаратә гәыԥқәа рҟынтәи 114-ҩык", ҳәа азгәарҭеит Аԥсны Ацентртә алхратә комиссиаҟны.

Аԥсны Жәлар Реизара – Апарламент ахь алхрақәа мҩаԥысраны иҟоуп 2017 шықәса хәажәкыра 12 рзы. Дара мҩаԥысуеит Аԥсны иахьаҵанакуа иаартхо 35 округ рҟны. Аԥсны ахы-аҵыхәа 152 алхырҭатә ҭыԥқәа еиҿкаауп. Атәылауаҩ ибжьы шиҭиз азы уаанӡа апаспорт аҟны иҟарҵоз адырга сынтәа иаԥыхуп. Апарламент адепутатцәа ирыдыркылаз алхрақәа рзы азакәан аԥсахрақәа рҟны иарбоуп адепутатрахь кандидатс зхы ықәзыргыло дарбанызаалак аусӡбара дақәымшәацзароуп, анаркотикатә маҭәашьарқәа шидимкылои аҩыжәра дшазгагами, аԥсихикатә чмазара шимами рзы аршаҳаҭгақәа имазароуп, алхрақәа рымш аҽны 25 шықәса ихыҵхьазароуп.

Ишьақәыргылоуп алхырҭатә ҭыԥқәа рҟны акабинақәа рыҟазаашьа, иаԥҵоуп дарбанызаалак абжьыҭиҩы маӡала ибжьы иҭирц азы аҭагылазаашьа маншәалақәа.

18 шықәса зхыҵхьоу Аԥсны атәылауаа зегьы ирымоуп азин рыбжьы рҭиирц. Алхратә ҭыԥқәа аус руеит 8.00 инаркны 20.00 сааҭ рҟынӡа.

Ажәабжьқәа зегьы
0