Аԥышәа еимадаратә урокқәа мҩаԥысит Гагратәи алицеи-интернат аҟны

© Sputnik / Саида ЖьиԥҳаАԥышәа еимадаратә урокқәа мҩаԥысит Гагратәи алицеи-интернат аҟны
Аԥышәа еимадаратә урокқәа мҩаԥысит Гагратәи алицеи-интернат аҟны - Sputnik Аҧсны
Анапаҵаҩра
НовостиTelegram
Иаарту арҵаҩцәа рԥышәа еимадаратә урокқәа мҩаԥысит Гагратәи алицеи-интернат аҟны.

ГАГРА, хәажәкыра 2 — Sputnik, Саида Жьиԥҳа. Есышықәса, традициала ишаԥу еиԥш, Аԥснытәи аинтернатқәа рыԥшьбагьы рҟны имҩаԥысуеит арҵаҩцәа рԥышәа еимадаразы еиуеиԥшым амаҭәарқәа рыла иаарту аурокқәа. Хәажәкыра 2 рзы Гагратәи алицеи-интернат аҟны Аҟәеи, Очамчыреи, Калдахәареи рҿы иҟоу аинтернатқәа рырҵаҩцәеи рааӡаҩцәеи гәыԥҩык алахәын аԥсуа бызшәеи, ахимиеи, агеографиеи рзы имҩаԥгаз иаарту аурокқәа, иара убас англыз бызшәала имҩаԥгаз алгебреи абиологиеи рмаҭәарқәа.

"Аԥснытәи аинтернатқәеи ҳареи аиҩызаратә цҳа ҳабжьоуп. Есышықәса аӡәи-аӡәи имҩаԥааго иаарту аурокқәа арҵаҩцәа иҿыцны иаларгало рацәоуп. Ҳаргьы иахьа излаҳалшоз ала ҳасасцәа идҳарбеит ҳааӡамҭацәа аус шрыдаауло, ҳхы иаҳархәо аметодика, иара убас ҳҵаҩцәа рдыррақәа", — лҳәеит Гагратәи алицеи-интернат аиҳабы Лиана Ԥлиаԥҳа.

Аҟәеи, Очамчыреи, Калдахәареи рҟнытә иааз асасцәа, гәахәарыла ирыдыркылеит ирбаз, ираҳаз.

"Сара иаарту аурокқәа рызнагашьа анаҩс, интересс исыман аԥсуа бызшәа аҭагылазаашьа, ахәыҷқәа рыбзазара аиҿкаашьа. Гагратәи алицеи-интернат аҟны амаҭәарқәа атәым бызшәақәа рылагьы имҩаԥысуеит аҟынтә, ахатәы бызшәа аԥыжәара ду амаӡам. Ахәыҷқәа рышьҭаларҭа уадақәа маҷк аремонт рыгуп, аха иааидкыланы Гагратәи-алицеи интернат аҭагылазаашьа хәшьарас иасҭоит "ԥшьба", — ҳәа азгәеиҭеит Аҟәатәи алицеи-интернат ааӡаратә ҟәша аиҳабы Басхан Чачхалиа.

Аԥсуа бызшәазы иаарту аурок азкын Баграт Шьынқәаба шәышықәса ихыҵра. Аҵаҩцәа, аамҭа кьаҿ иалагӡаны ирылдыршеит Аԥсны Жәлар рпоет иԥсҭазаареи ирҿиаратә мҩеи, еицырдыруа ирҿиамҭақәеи арылацәажәара.

"Асасцәа рҿаԥхьа ҳааӡамҭацәа иаадырԥшит шаҟа аԥсуа литературазы адырра ҳаракқәа шрымоу. Баграт Шьынқәба ироман "Ахаҳә еиҩса" еихыршәшәаны аилыркаа ҟарҵеит. Саргьы аурок ахықәкы насыгӡеит", — ҳәа ҳаиллыркааит аԥсуа бызшәа арҵаҩы Марина Папба.

Даара аинтерес аманы имҩаԥысит агеографиазы амаҭәар. Араҟа тема хадас излацәажәоз Иапониа акультуреи акьабзқәеи ракәын.

"Сара агеографиазы иаарту аурок аҟны салацәажәеит Иапониа ахәыҷқәа рааӡашьа ақьабз. Дара асаби ԥшьышықәса ихыҵаанӡа иҟаиҵалакгьы дахдырҟьаӡом, адунеи ҭиҵаауеит ҳәа иԥхьаӡоуп. Ԥшьышықәса инаркны жәиԥшь шықәсанӡа ахәыҷы иҭаацәа тәыс дрымоуп, рҳәатәы ҟаиҵоит. Анаҩс, жәиԥшь шықәса днырҭыслак ҩызас дырзыҟалоит, аӡәи-аӡәи еизҵаауеит, — ҳәа аурок аҟны дызлацәажәоз атема дазааҭгылеит 11-тәи акласс аҵаҩы Леон Џьынџьал.

Иахьа Гагратәи алицеи-интернат аҟны аҵара рҵоит 7-тәи акласс инаркны 11-тәи аклассынӡа, 130-ҩык еиуеиԥшым Аԥснытәи ашколқәа рҟынтә иалԥшаау здыррақәа ҵаулоу ахәыҷқәа. Сынтәа алицеи-интернат иоунажьуеит 22-ҩык аҿар. Дара адунеи аҿы иреиӷьу аҵараиурҭақәа рҟны агәашәқәа рзаатуп.

Ажәабжьқәа зегьы
0