Аԥсны Валериа илыцгәырӷьон

Анапаҵаҩра
Амузыкатә проект "Ты супер!" алахәыла Валериа Адлеиаԥҳа асабша, хәажәкыра 4 рзы лықәгылараан аҩбатәи атур ахь днеиит. Лара иналыгӡеит Лара Фабиан лашәа "Adagio".

Анжелика Бениаԥҳа, Sputnik

Амузыкатә проект "Ты супер!" алахәыла Валериа Адлеиаԥҳа асабша, хәажәкыра 4 рзы имҩаԥысуаз раԥхьатәи лықәгылара иамыхәаԥшуаз аӡә дыҟамзар ҟаларын Аԥсны. Лера лықалақь гәакьа Очамчыра акәзар ирыӡбеит аҩны итәаны аконцерт ахәаԥшра ацынхәрас Акультура Ахан аҟны аконцерт иахәаԥшырц.

Валериа лцәырҵра зегь азыԥшын. Лара абыжьбатәи лакәны дцәырҵит. Лера иналыгӡон Лара Фабиан лашәа "Adagio". Раԥхьатәи асекундқәа рзыҵәҟьа Виктор Дробыш акнопка дақәыӷәӷәеит. Егьырҭ ажиури алахәылацәагьы рцәаныррақәа рзыҵәахуамызт.

Валериа Адлеиԥҳа шәыбжьы лышәҭар ҟалоит абра

Очамчыратәи Акультура Ахан аҟны акәзаргьы аҭагылазаашьа иҵегьы цәаныррылеи гәырӷьарылеи иҭәын. Анапенҟьабжьқәа еихсыӷьуамызт. Лера ландуцәа ракәзар ршьақәыӷәӷәарақәа халеит.

"Дхәыҷаахыс ашәаҳәара бзиа илбон. Иубаратәы иҟан аҟыбаҩ шлымаз. Амузыкатә школ ахь дрышьҭырц лҭаацәа ирасҳәон, аха макьана аҵара даҿызааит ҳәа иршьон. Аха ишыжәбо еиԥш амузыка аԥыжәара агеит", — лҳәоит Лера ланду Алла Адлеиаԥҳа.

Лера класск аҟны аҵара лыцызҵоз лҩызцәа рылаӷырӡқәа рзыҵәахуамызт. Валериа Ԥерцхелиа: "Сара издыруан ибзианы дшықәгылоз, аха асҵәҟьа сақәгәыӷуамызт. Ажәала аиҭаҳәара уадаҩуп сҭагылазаашьа".

Очамчыраа Валериа Адлеиԥҳа адгылара лзыҟарҵоит - Sputnik Аҧсны
Очамчыраа Валериа адгылара лзыҟарҵоит

Амузыказ Валериа лырҵаҩы Лика Ҵәыџьԥҳа: "Раԥхьатәи анотақәа рышьҭахь сгәырӷьа-лаӷырӡқәа рҿаархеит. Макьаназ актәи атур ауп, ԥхьаҟа иҟалаша седроу. Агәра згоит ауадаҩрақәа зегьы дыриааип ҳәа".

Апроект "Ты супер!" хәажәкыра 4 рзтәи аефир аҟны дцәырҵит Валериа Адлеиаԥҳа.

Апроект "Ты супер!" мҩаԥысуеит Урыстәыла Аҵареи аҵарадырреи рминистрра адгыларала. Апроект амҩаԥгаҩыс дыҟоуп Вадим Такмениов. Валериа Адлеиаԥҳа шәыбжьы лышәҭар ҟалоит абра Ахәыҷтәы вокалтә еиндаҭлара "Ты супер!" мҩаԥысуеит ателеканал НТВ аҟны жәабран 11 инаркны. Апроект азы инарҭбаау аинформациа аиура алшоит НТВ асаит аҟны. Ашоу иазку ажәабжьқәа рдырра шәылшоит Sputnik Аԥсны аресурсқәа рҟны. Аинформациатә маҵзуреи арадио Sputnik хылаԥшра арҭоит аиндаҭлара амҩаԥысшьа. Иара иалахәуп 92-ҩык авокалистцәа: Урыстәыла, Аԥсны, Азербаиџьан, Ермантәыла, Беларуссиа, Қырҭтәыла, Ҟазахсҭан, Кыргызсҭан, Молдавиа, Украина, Естониа, Аахыҵ Уаԥстәыла рҟынтәи.

Ажәабжьқәа зегьы
0