АҞӘА, хәажәкыра 12 — Sputnik, Бадраҟ Аҩӡба. Аԥсны ахы-аҵыхәа алхратә ҭыԥқәа зегьы шьыжьнаҵы иаадыртит.
"Алхратә ҭыԥқәа азакәан ишаҳәо ала асааҭ ааба рзы иааҳартит. Иарбанызаалак проблемак ҟамлеит. Агәыӷра ҳамоуп алхрақәа хаҭабзиаралеи ҩаӡара ҳаракылеи миҩаԥысып ҳәа", ҳәа азгәарҭеит Ацентртә алхратә комиссиаҟны.
"Ҳара алхрақәа ҳарзыхиоуп. Акомиссиақәа рлахәылацәа асааҭ быжьба рыбжазы рҭыԥқәа рахь инеиит. Раԥхьа иргыланы абиуллетенқәа рыԥхьаӡеит, нас ҵәҭаԥсарала урҭ амҳәыр раазырхоз далырхит. Асааҭ ааба рзы ашәқәа ааҳартит", — лҳәеит Аҟәатәи актәи алхырҭатә ҭыԥ алхратә комиссиа ахантәаҩы Аида Кәарҷелиаԥҳа.
Аамҭа акыр ишзаазгьы алхырҭатә ҭыԥ аҿы ауаа маҷымкәа инеиит. Урҭ Аԥсны ԥхьаҟатәи аԥеиԥш Апарламент аусура иадырҳәалоит.
"Сара сгәыӷуеит Апарламент атәылаҿ иахәҭаны иҟоу ареформақәа ишахәҭоу рымҩаԥгара алнаршап ҳәа. Сара аиҭакрақәа срыдгылаҩуп", — лҳәеит алхыҩ Диана Логәуаԥҳа.
Аԥсны Жәлар Реизарахь алхрақәа мҩаԥысуеит хәажәкыра 12 рзы 35 алхратә ҭыԥқәа рҿы. Дииааит ҳәа дыԥхьаӡоуп 50% + 1 бжьы зауз акандидат. Ариаҟара бжьы иқәгылаз акандидатцәа рҟынтәи аӡәгьы имоузар, аҩбатәи атур мҩаԥгахоит. Алхрақәа шьақәгылеит ҳәа иазыԥхьаӡоуп абжьыҭиҩцәа рааира 25% артәазар.
