Иҭахаз ргәалашәара иазку аконцерт мҩаԥгахоит афилармониаҟны

© Sputnik / Томас ТхайцукSputnik Аԥсны апресс-центр аҟны аконцерт аиҿкааҩцәа алацәажәеит апрограмма ашьақәгылашьа
Sputnik Аԥсны апресс-центр аҟны аконцерт аиҿкааҩцәа алацәажәеит апрограмма ашьақәгылашьа - Sputnik Аҧсны
Анапаҵаҩра
НовостиTelegram
Аԥшьаша, хәажәкыра 16, асааҭ 18.00 рзы Аԥснытәи афилармониаҟны имҩаԥгахоит Аԥсны жәлар Рџьынџьтәылатә еибашьраҟны иҭахаз ргәалашәара иазку аконцерт. Аиҿкааҩцәа иазгәарҭоит апрограмма ишалагалоу уаанӡа Аԥсны инармыгӡацыз Малер ирҿиамҭақәа.

Sputnik, Владимир Бегунов

Sputnik Аԥсны апресс-центр аҟны аконцерт аиҿкааҩцәа алацәажәеит апрограмма ашьақәгылашьа. Аконцерт иалахәхоит Вадим Судаков ихьӡ зху Москватәи аҳәынҭқарратә капелла, Аԥсны аҳәынҭқарратә камертә оркестр, Владимир Спиваков и-Хәыҷтәы фонд асолистцәа. Апрограмма иалоуп Бах, Вивальди, Гайдн рырҿиамҭақәа, иара убасгьы апрограмма уаанӡа Аԥсны инармыгӡацыз Густав Малер ирҿиамҭақәа.

Аконцерт-реквием хынтәуп Аԥсны имҩаԥысуеижьҭеи.

"Ари традициак еиԥшхеит. Аԥснытәи афилармониаҟны раԥхьатәи аконцерт 2013 шықәса рзы имҩаԥылгеит Алиса Гыцԥҳа. Усҟан инагӡан Верди и- "Реквием", — лҳәоит Ражьден Гәымба ихьӡ зху Аԥснытәи Аҳәынҭқарратә филармониа асахьаркыратә напхгаҩы Есма Џьениаԥҳа.

Есма Џьениаԥҳа лажәақәа рыла амузыкатә литератураҿы ирацәоуп агәырҩара аарԥшра зылшо арҿиамҭақәа.

Москватәи акапелла асахьаркыратә напхгаҩы Анатоли Судаков еиҭеиҳәеит акапеллеи Аԥснытәи акамертә оркестри мызкы иназынаԥшуа аскаип ала аконцерт рҽшазыҟарҵоз. Амузыкантцәа анотақәа еимырдон, хаз-хазы аҽазыҟаҵарақәа мҩаԥыргон. Уажәы аконцерт аԥхьа арепитициа хада еицымҩаԥыргараны иҟоуп.

Возложение к мемориалу погибшим в парке Славы - Sputnik Аҧсны
Марттәи ажәылараҿ иҭахаз ргәаладыршәеит Аԥсны Ахадара

"Ахәаԥшыҩцәа раԥхьаӡа акәны ирызцәыраагоит Малер ирҿиамҭақәа. Араҟа ацхыраара ҳалҭоит арфарҳәаҩы Елена Ҳагԥҳа. Уи ҳара ҳгәадура лоуп, избанзар Аԥсны акәым Урыстәыла аладатәи акалҭ иахьаҵанакуа џьаргьы дыҟаӡам арфарҳәаҩы. Лара даӡәыкуп", — иҳәеит Аԥсны Аҳәынҭқарратә камертә оркестр адирижиор хада Давид Терзиан.

Есма Џьениаԥҳа иазгәалҭоит арҭ аконцертқәа акоммерциатә шьаҭа шрымам. Дара Аԥсны Акультура аминистрреи Владимир Спиваков и-Гәыҳалалратә фонди аԥаразоужьра шырнаҭо.

"Ирацәаҩуп асоциалтә ҳақәа рҟны Аԥсны Вагнер изыӡырыҩрра ҳҭахуп ҳәа зыҩуа, аха уи азы аоркестр ду аҭахуп. Ҳара зны иҳаман усеиԥш иҟаз аоркестр, аха… Ари проблемоуп. Аӡбра аҭахуп. Уи адагьы иахьатәи аамҭазы имаҷуп аԥсыԥтә инструментқәа рыхәмаррахь зхәыҷқәа назго", — лҳәеит Есма Џьениаԥҳа.

Давид Терзиан иажәақәа рыла асеиԥш иҟоу аоркестр аԥҵаразы аҳәынҭқарратә знеишьа аҭахуп.

"Урыстәылантәи ауаа ааԥхьатәуп. Урҭ нхарҭала еиқәыршәатәуп. Иҟалап ԥшьба-хәба шықәса рышьҭахь алҵшәақәа ҳаур. Ҳара Аԥсны агимн аҭаҩрала акәымкәа аоркестр иаҳәо иҟалар ҳҭахызар, аҳәынҭқарратә хәыцрала ҳазнеироуп", — иҳәеит иара.

Аконцерт-реквием мҩаԥысраны иҟоуп Аҟәа, Аԥснытәи Аҳәынҭқарратә филармониаҟны хәажәкыра 16, асааҭ 18.00рзы.

Ажәабжьқәа зегьы
0